AQSH davlat kotibi yordamchisi vazifasini bajaruvchi, Davlat departamentining Xalqaro jamoatchilik bilan aloqalar byurosi rahbari Elizabet Tryudo “Amerika ovozi”ga bergan intervyusida Saida Mirziyoyeva tizimda o‘z o‘rniga ega shaxs ekanligini aytdi.
Elizabet Kennedi Tryudo 3—6-oktabr kunlari O‘zbekistonga tashrif bilan kelgandi. Tashrif davomida u Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi o‘rinbosari Saida Mirziyoyeva bilan uchrashgandi.
“Uning o‘ziga xos mutaxassis ekani va yurtiga mehr-muhabbati, qator mavzularni, jumladan, xotin-qizlarning huquqlari, gender masalalari hamda matbuot erkinligi ahamiyatini muhokama qildik. Dеzinformatsiya xususida ancha fikr almashdik. AQSH va O‘zbekistonda bu muammo odamlar hayotiga qanchalik ta’sir qilishini tushunamiz. Uni hal etish naqadar qiyin ekanini jurnalist sifatida yaxshi bilasiz. Bu — tezlikda murakkab tus olayotgan muammo. Dеzinformatsiya chegara tanlamaydi. Unga qarshi birgalikda kurashishimiz kerak. Odamlarimizga bu muammoni yengish uchun qanday yordam bera olamiz? Uchrashuvda shunga ancha diqqat qaratdik”, — degan Elizabet Tryudo u bilan bo‘lgan suhbat haqida.
“Amerika ovozi” jurnalistining AQSH rasmiylari mintaqaga borganida prezident oilalaridan uzoqda yurishi, Tryudo esa hokimiyat tepasidagi odamning oila a’zosi bilan ko‘rishgani ajablanarli ekanini qayd etib, uning bu boradagi fikrlari bilan qiziqqan.
“Fond rahbari ekan, (Saida Mirziyoyeva bilan) judayam bemalol ko‘rishdim, chunki uning tashkiloti muhim ishlar bilan band — nafaqat xotin-qizlar huquqlari, balki ayol tadbirkorlarni quvvatlash, shuningdek, matbuot erkinligi targ‘iboti — bu inson ushbu masalalar bilan sidqidildan shug‘ullanib kelayotganini bilamiz. AQSH bunday odamlar bilan uchrashib, muammolar ustida biz singari qayg‘urayotgan insonlar bilan muloqot qiladi”, — degan AQSH davlat kotibi yordamchisi bunga javoban.
Jurnalistning “Demak, Saida Mirziyoyeva siz uchun tizimda o‘z o‘rniga ega shaxs?”, degan savoliga “Shubhasiz, shunday”, deya javob bergan.
Izoh (0)