Surxondaryoning Muzrabot tuman sobiq hokimi Erkin Alimovga nisbatan jinoyat ishi qo‘zg‘atildi. Bu haqda O‘zA xabar berdi.
Ma’lum qilinishicha, 2022-yilning sentabrida lavozimidan ozod qilingan Muzrabot tumanining sobiq hokimi Erkin Alimovga nisbatan DXX Surxondaryo viloyati bo‘yicha boshqarmasi tomonidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 205-moddasi (hokimiyat yoki mansab vakolatini suiiste’mol qilish) va 209-moddasi (mansab soxtakorligi) bilan jinoyat ishi qo‘zg‘atilgan.
Dastlabki tergov harakatlari davomida ma’lum bo‘lishicha, u mazkur tumandagi umumiy qiymati 1,7 milliard so‘m bo‘lgan 4,2 gektar yer maydonini auksion savdolarisiz o‘zining yaqin qarindoshlariga rasmiylashtirib bergan.
Shuningdek, tumandagi banklar uning yaqin qarindoshlari nomlariga turli maqsadlarda 166 mlrd. so‘m miqdorida imtiyozli kredit mablag‘lari ajratgan bo‘lib, ularning katta qismi muammoli kreditga aylangan. Hozirda bank muassasalari tomonidan o‘z vaqtida to‘lovlari amalga oshirilmagan 121 milliard 406 million so‘mlik kredit mablag‘larini undirish yuzasidan tegishli ishlar olib borilmoqda.
Bundan tashqari, “Surxondaryodonmahsulotlari” AJda olib borilayotgan taftish davomida aniqlanishicha, hokim ishtirokida qiymati 35 milliard so‘mlik 9,6 ming tonna don talon-toroj qilingan. Erkin Alimov 2010—2017-yillarda ushbu jamiyat rahbari lavozimida faoliyat olib borgan.
Hozirda jinoyat ishi bo‘yicha jamiyatning 20 dan ortiq mas’ul-mansabdor shaxslari tergov harakatlariga jalb qilingan va ular Erkin Alimovning noqonuniy xatti-harakatlari yuzasidan ko‘rsatmalar bermoqda. Hozirda tergov harakatlari davom ettirilmoqda.
Izoh (0)