АҚШ давлат котиби ёрдамчиси вазифасини бажарувчи, Давлат департаментининг Халқаро жамоатчилик билан алоқалар бюроси раҳбари Элизабет Трюдо «Америка овози»га берган интервьюсида Саида Мирзиёева тизимда ўз ўрнига эга шахс эканлигини айтди.
Элизабет Кеннеди Трюдо 3—6 октябрь кунлари Ўзбекистонга ташриф билан келганди. Ташриф давомида у Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари Саида Мирзиёева билан учрашганди.
«Унинг ўзига хос мутахассис экани ва юртига меҳр-муҳаббати, қатор мавзуларни, жумладан, хотин-қизларнинг ҳуқуқлари, гендер масалалари ҳамда матбуот эркинлиги аҳамиятини муҳокама қилдик. Дезинформация хусусида анча фикр алмашдик. АҚШ ва Ўзбекистонда бу муаммо одамлар ҳаётига қанчалик таъсир қилишини тушунамиз. Уни ҳал этиш нақадар қийин эканини журналист сифатида яхши биласиз. Бу — тезликда мураккаб тус олаётган муаммо. Дезинформация чегара танламайди. Унга қарши биргаликда курашишимиз керак. Одамларимизга бу муаммони енгиш учун қандай ёрдам бера оламиз? Учрашувда шунга анча диққат қаратдик», — деган Элизабет Трюдо у билан бўлган суҳбат ҳақида.
«Америка овози» журналистининг АҚШ расмийлари минтақага борганида президент оилаларидан узоқда юриши, Трюдо эса ҳокимият тепасидаги одамнинг оила аъзоси билан кўришгани ажабланарли эканини қайд этиб, унинг бу борадаги фикрлари билан қизиққан.
«Фонд раҳбари экан, (Саида Мирзиёева билан) жудаям бемалол кўришдим, чунки унинг ташкилоти муҳим ишлар билан банд — нафақат хотин-қизлар ҳуқуқлари, балки аёл тадбиркорларни қувватлаш, шунингдек, матбуот эркинлиги тарғиботи — бу инсон ушбу масалалар билан сидқидилдан шуғулланиб келаётганини биламиз. АҚШ бундай одамлар билан учрашиб, муаммолар устида биз сингари қайғураётган инсонлар билан мулоқот қилади», — деган АҚШ давлат котиби ёрдамчиси бунга жавобан.
Журналистнинг «Демак, Саида Мирзиёева сиз учун тизимда ўз ўрнига эга шахс?», деган саволига «Шубҳасиз, шундай», дея жавоб берган.
Изоҳ (0)