Qashqadaryo viloyatining Kasbi tumanida joylashgan korxonaning hindistonlik ishchisi qashqadaryoliklarni haqorat qilgani uchun javobgarlikka tortiladi. Bu haqda O‘zbekiston Respublikasi Ichki ishlar vazirligining Kiberxavfsizlik markazi rasmiy kanalida xabar berildi.
Ma’lum qilinishicha, viloyatdagi Indorama agro MCHJ mas’ullari viloyat IIBga murojaat qilib, Telegram messenjiridagi guruhda “Rahul” nomli foydalanuvchi ingliz tilida ishchi xodimlarini haqorat qilib, bir qancha ishchilarning e’tirozlarga sabab bo‘lganligini bildirgan va ushbu shaxsni aniqlab, unga nisbatan qonuniy chora ko‘rishlikni so‘ragan.
Tezkor-qidiruv tadbirlari natijasida Telegram messenjerida xaqoratli so‘zlarni ishlatgan shaxs Hindiston davlatida tug‘ilgan, hozirda Indorama agro MCHJda ishlovchi xodim K.R. ekani aniqlangan.
K.R.ga nisbatan Jinoyat kodeksining 140-modda 2-qismi (nashr qilish yoki boshqacha usulda ko‘paytirilgan tarzda, shu jumladan, ommaviy axborot vositalarida, telekommunikatsiya tarmoqlarida yoki internet jahon axborot tarmog‘ida joylashtirish orqali haqorat qilish) bilan jinoyat ishi qo‘zg‘atilib, tergov harakatlari olib borilmoqda.
O‘zbekiston qonunchiligiga ko‘ra, hindistonlik fuqaroning aybi tasdiqlansa u bazaviy hisoblash miqdorining ikki yuz baravaridan to‘rt yuz baravarigacha miqdorda jarima yoki ikki yuz qirq soatdan uch yuz soatgacha majburiy jamoat ishlari yoxud bir yildan ikki yilgacha axloq tuzatish ishlari bilan jazolanishi mumkin.
Izoh (0)