Farg‘onada profilaktika inspektorining avtomashinasi oynasini tepib sindirib, unga pichoq o‘qtalgan va tan jarohati yetkazgan shaxsga nisbatan jinoyat ishi qo‘zg‘atildi. Bu haqda “Daryo”ga viloyat IIB axborot xizmati ma’lum qildi.
Qayd etilishicha, joriy yilning 27-oktabr kuni Qo‘qon shahar Muqimiy shaharchasida yashovchi fuqaro 102 qisqa raqami orqali murojaat qilib, farzandining uyali telefonini noma’lum shaxs foydalanish uchun so‘rab olib, qaytarib bermasdan ketib yuborganini ma’lum qilgan.
Mazkur murojaat yuzasidan ushbu hudud profilaktika inspektori tomonidan tergovga qadar tekshiruv harakatlari olib borilgan. Surishtiruv davomida telefon apparati shaharning 1-tor ko‘chasida yashovchi voyaga yetmagan O‘.A. tomonidan olib ketilgani aniqlangan.
29-oktabr kuni profilaktika inspektori gumonlanuvchi bilan ko‘rishgan vaqtda u xodimning qonuniy talablariga bo‘ysunmasdan turli noo‘rin so‘zlar bilan haqorat qilgan. Shundan so‘ng, qo‘lidagi pichoqni profilaktika inspektoriga o‘qtalib, avtomashinasining old yon oynasini tepib sindirgan. Avtomashina yon oynasining sinishi natijasida profilaktika inspektori yuz sohasidan tan jarohati olgan.
Mazkur holat yuzasidan O‘.A. ga nisbatan Jinoyat kodeksining 168, 219-moddalari (hokimiyat vakiliga yoki fuqaroviy burchini bajarayotgan shaxsga qarshilik ko‘rsatish) bilan jinoyat ishi qo‘zg‘atilib, gumonlanuvchi protsessual tartibda ushlangan.
Hozirda mazkur holat yuzasidan tergov harakatlari olib borilmoqda.
Izoh (0)