Ta’lim maskanlari tasarrufidagi binolar va yer uchastkalari Xalq ta’limi vaziri ruxsatisiz boshqalarga o‘tkazilmasligi bo‘yicha maxsus qaror bo‘lishiga qaramay 198 ta holatda 70 gektar yer maydoni va 19 ta binolar hokimlar qarori bilan maktablardan olib qo‘yilgan yoki o‘zboshimchalik bilan egallab olingan.
Bu haqda kecha, 1-noyabr kuni davlat rahbari Shavkat Mirziyoyevning topshirig‘i asosida Prezident Administratsiyasi rahbari Sardor Umrzoqov raisligida o‘tkazilgan yig‘ilishda aytib o‘tildi.
Ta’kidlanishicha, prezident qaroriga muvofiq, maktab tasarrufidagi yer maydonlari va binolar faqat Xalq ta’limi vaziri roziligi bilangina olinishi mumkin. Lekin vazir ruxsatisiz davlat zaxirasiga olingan, uy-joy yoki ijtimoiy bino qurib olingan holatlar ham ko‘p.
Yig‘ilishda bosh prokuraturaga vaziyatni nazoratga olish va qonuniy choralar ko‘rish, yerlarni qaytarish bo‘yicha sudga da’vo arizalari kiritish vazifasi yuklandi.
Eslatib o‘tamiz, prezident Shavkat Mirziyoyev 31-avgust kuni Mustaqillik bayrami munosabati bilan so‘zlagan nutqida 2026-yilgacha Taraqqiyot strategiyasi doirasida 5 ta asosiy vazifani belgilab bergan edi. Ulardan birinchisi aynan ta’lim sohasiga oid bo‘lgandi.
Izoh (0)