“Daryo” nashrida Surxondaryo viloyatining Sho‘rchi tumanida 66-maktab o‘quvchilari tahsil olayotgan bino tortib olinib, o‘quvchilar ko‘chada qolgani, odamlar xonadonida o‘qishga majbur bo‘layotgani haqida xabar berilgandi.
Bu holat bir haftadan beri davom etmoqda. Vaziyat haqida Xalq ta’limi vazirligiga ham murojaat qildik. Muammoni aytdik, ammo ular bunga e’tibor bermayapti, — degandi mazkur holat haqida tahririyatga murojaat qilgan ota-onalardan biri.
O‘zAning xabar berishicha, Prezident adminstratsiyasi rahbari Sardor Umurzoqov rahbarligidagi yig‘ilishda mazkur voqea sabab Sho‘rchi tumani hokimi Baxtiyor Xudoyberganovga hayfsan berilgan.
Ma’lum qilinishicha, kecha, 1-noyabr kuni Prezident administratsiyasi rahbari Sardor Umurzoqov raisligida xalq ta’limi tizimidagi mavjud muammolarga bag‘ishlangan videoselektor yig‘ilishi bo‘lib o‘tgan.
Unda Surxondaryo viloyatining Sho‘rchi tumanida oddiy maktabni ixtisoslashtirilgan maktabga aylantirish chog‘ida mas’ullar tomonidan yo‘l qo‘yilgan o‘zboshimchalik va o‘z ishiga sovuqqonlik jiddiy tanqid qilingan.
Bu nima degan gap?! Inson qadri shumi? Toshkentda, yozda salqin, qishda issiq kabinetlarda o‘tirgan amaldorlar bolalari qishloqning loy yo‘llarida har kuni 10 kilometrlab yurishiga, aholi uylarida o‘qishiga rozi bo‘lisharmidi? Yana uylarda ta’lim berayotgan o‘qituvchilarga maosh ham berilmayapti ekan. O‘qituvchining nima aybi bor bu yerda?! — deya e’tiroz bildirgan Sardor Umurzoqov.Qo‘shimcha qilinishicha, mazkur voqea ortidan Sho‘rchi tumani hokimi Baxtiyor Xudoyberganovga hayfsan berilgan, o‘quvchilarni aholi uylarida o‘qitishga bosh qo‘shgan tuman hokimi o‘rinbosari va xalq ta’limi bo‘limi mudiri lavozimidan ozod etilgan.
Izoh (0)