Қашқадарё вилоятининг Касби туманида жойлашган корхонанинг ҳиндистонлик ишчиси қашқадарёликларни ҳақорат қилгани учун жавобгарликка тортилади. Бу ҳақда Ўзбекистон Республикаси Ички ишлар вазирлигининг Киберхавфсизлик маркази расмий каналида хабар берилди.
Маълум қилинишича, вилоятдаги Indorama agro МЧЖ масъуллари вилоят ИИБга мурожаат қилиб, Telegram мессенжиридаги гуруҳда «Раҳул» номли фойдаланувчи инглиз тилида ишчи ходимларини ҳақорат қилиб, бир қанча ишчиларнинг эътирозларга сабаб бўлганлигини билдирган ва ушбу шахсни аниқлаб, унга нисбатан қонуний чора кўришликни сўраган.
Тезкор-қидирув тадбирлари натижасида Telegram мессенжерида хақоратли сўзларни ишлатган шахс Ҳиндистон давлатида туғилган, ҳозирда Indorama agro МЧЖда ишловчи ходим К.Р. экани аниқланган.
К.Р.га нисбатан Жиноят кодексининг 140-модда 2-қисми (нашр қилиш ёки бошқача усулда кўпайтирилган тарзда, шу жумладан, оммавий ахборот воситаларида, телекоммуникация тармоқларида ёки интернет жаҳон ахборот тармоғида жойлаштириш орқали ҳақорат қилиш) билан жиноят иши қўзғатилиб, тергов ҳаракатлари олиб борилмоқда.
Ўзбекистон қонунчилигига кўра, ҳиндистонлик фуқаронинг айби тасдиқланса у базавий ҳисоблаш миқдорининг икки юз бараваридан тўрт юз бараваригача миқдорда жарима ёки икки юз қирқ соатдан уч юз соатгача мажбурий жамоат ишлари ёхуд бир йилдан икки йилгача ахлоқ тузатиш ишлари билан жазоланиши мумкин.
Изоҳ (0)