O‘zbekistonda muomaladagi naqd pul miqdori yana ko‘paya boshladi

O‘zbekistonda muomaladagi naqd pul miqdori 43,8 trln so‘mga yetdi. Bu haqda “Daryo”ga Markaziy bank hisobotidan ma’lum bo‘ldi.

Muomalaga chiqarilgan naqd pullar may oyida 3,7 trln so‘mga ko‘paygan bo‘lsa, iyun oyida bu ko‘rsatkich 3,6 trln so‘m bo‘lgan edi. 

Iyul oyida naqd pul miqdori ko‘payishi sekinlashdi va 1,9 trln so‘mga o‘sdi. Avgust oyida esa fevral oyidan beri ilk bor bu ko‘rsatkich kamaydi — 79 mlrd so‘mga. 

Sentabr oyida muomaladagi naqd pullar 1,4 trln so‘mga ko‘payib, 43,8 trln so‘mga yetdi. 

May oyida keng ma’nodagi pul massasi rekord darajada ko‘payib, (+13,3 trln so‘m)  158,5 trln so‘m bo‘lgan edi. Iyunda esa bu ko‘rsatkich deyarli o‘zgarishsiz qoldi. Iyulda 159,1 trln so‘mga yetdi.

Avgust oyida keng ma’nodagi pul massasi 9 trln so‘mga oshgan bo‘lsa, Sentabrda o‘sish 8 trln so‘mni tashkil qildi. 

Shuningdek, o‘tgan oyda milliy valyutadagi jami pul massasi 1,6 trln so‘mga oshib, 124,1 trln so‘mga yetgan.

Markaziy bank tomonidan joriy yilning dastlabki 6 oyi mobaynida muomalaga qo‘shimcha 13,6 trln so‘m naqd pullar chiqarildi. 

Bundan tashqari, naqd pulga bo‘lgan talabni qondirish maqsadida, 15-iyuldan O‘zbekistonda 200 ming so‘mlik banknota muomalaga kiritildi. 

Avvalroq O‘zbekistonda yil boshidan beri qancha pul bankomatlar orqali naqdlashtirilgani ma’lum bo‘lgandi.