Davlat soliq qo‘mitasi to‘lov tizimlaridan joyida to‘lovlar, QR-kod orqali to‘lov, Telegram kanallarida to‘lov — barcha to‘lovlarni fiskallashtirishni talab qilgani ortidan Payme, Click, Apelsin va boshqa to‘lov tashkilotlarining muhim funksiyalari ishlashdan to‘xtagani haqida xabar berilgandi. Qo‘mita raisi o‘rinbosari Jahongir Abdiyev “Daryo” jurnalisti Musulmonbek Ibrohimov bilan suhbatda kechagi holatga izoh berdi.
Ta’kidlanishicha, kecha 1-noyabr kuni onlayn to‘lov tizimlari rahbarlari va qo‘mita rahbariyati uchrashgan. Ularga yuborilgan xabarnoma moliyaviy jarima qo‘llash emas, balki ularga ogohlantirish ko‘zda tutilgani haqida tushuntirilgan. Shundan so‘ng to‘lov tizimlariga integratsiya uchun 15 kun qo‘shimcha muddat berilgan. Va kechga borib onlayn to‘lovlar yana ishlay boshlagan.
Kecha onlayn to‘lov tizimlari faoliyatining to‘xtab qolishiga ular tomonidan normativ hujjatlar noto‘g‘ri talqin qilingani sabab bo‘ldi. Bugunga qadar 48 ta to‘lov tizimidan 26 tasi tizimni integratsiya qilib bo‘lgan. Qolgan 22 ta to‘lov tizimi hali fiskallashtirilgan tizim orqali to‘lovlarni amalga oshirmagan, — deydi qo‘mita raisi o‘rinbosari.Qo‘mita raisi o‘rinbosarining ta’kidlashicha, barcha to‘lovlarni fiskallashtirishni talab qilish tizimi O‘zbekistonda joriy etilishidan avval Qozog‘iston, Rossiya Turkiya va Janubiy Koreya davlatlari tajribasi o‘rganilgan.
1-noyabr kuni to‘lov tizimlari o‘z faoliyatini to‘xtatib qo‘yishini biz oqlamaymiz. Ular nima maqsadda bu ishni qilganini ham bilmaymiz, — deydi Jahongir Abdiyev.
Izoh (0)