Давлат солиқ қўмитаси тўлов тизимларидан жойида тўловлар, QR-код орқали тўлов, Telegram каналларида тўлов — барча тўловларни фискаллаштиришни талаб қилгани ортидан Payme, Click, Апельсин ва бошқа тўлов ташкилотларининг муҳим функциялари ишлашдан тўхтагани ҳақида хабар берилганди. Қўмита раиси ўринбосари Жаҳонгир Абдиев «Дарё» журналисти Мусулмонбек Иброҳимов билан суҳбатда кечаги ҳолатга изоҳ берди.
Таъкидланишича, кеча 1 ноябрь куни онлайн тўлов тизимлари раҳбарлари ва қўмита раҳбарияти учрашган. Уларга юборилган хабарнома молиявий жарима қўллаш эмас, балки уларга огоҳлантириш кўзда тутилгани ҳақида тушунтирилган. Шундан сўнг тўлов тизимларига интеграция учун 15 кун қўшимча муддат берилган. Ва кечга бориб онлайн тўловлар яна ишлай бошлаган.
Кеча онлайн тўлов тизимлари фаолиятининг тўхтаб қолишига улар томонидан норматив ҳужжатлар нотўғри талқин қилингани сабаб бўлди. Бугунга қадар 48 та тўлов тизимидан 26 таси тизимни интеграция қилиб бўлган. Қолган 22 та тўлов тизими ҳали фискаллаштирилган тизим орқали тўловларни амалга оширмаган, — дейди қўмита раиси ўринбосари.Қўмита раиси ўринбосарининг таъкидлашича, барча тўловларни фискаллаштиришни талаб қилиш тизими Ўзбекистонда жорий этилишидан аввал Қозоғистон, Россия Туркия ва Жанубий Корея давлатлари тажрибаси ўрганилган.
1 ноябрь куни тўлов тизимлари ўз фаолиятини тўхтатиб қўйишини биз оқламаймиз. Улар нима мақсадда бу ишни қилганини ҳам билмаймиз, — дейди Жаҳонгир Абдиев.
Изоҳ (0)