Украина президенти Владимир Зеленский «Чехия телевидениеси»га берган интервьюсида Қримда денгизни томоша қилиш орзуси ҳақида гапирди.
«Ғалабадан кейин Қримга бораман. Денгизни кўришни жуда хоҳлайман», — деди у жанговар ҳаракатлар тугагандан сўнг биринчи навбатда нима қилиши ҳақидаги саволга жавобан.
Қримга қачон боришни хоҳлаши ҳақидаги саволга жавоб берар экан, Зеленский шундай деди: «Қишда эмас, албатта, чунки қишда денгизда нима қилиб бўларди. Кунлар илиганда бораман».
Ўша интервью аввалида у Украина армияси Қрим қўлга киритилгунга қадар ҳужумни давом эттиришини айтган. «Чунки, агар улар (Россия кучлари — «Дарё» изоҳи) Донбасс ва Қримни тарк этмаса, бу урушнинг тугашини англатмайди. Аввал ҳам шундай ҳолатни бошдан кечирганмиз. Бу фақатгина можаронинг музлатиб қўйилиши бўлади», — деб тушунтирди Украина раҳбари.
Маълумот учун, 2014 йил март ойида Қримда референдум бўлиб ўтган, унда яриморол аҳолисининг аксарияти Россияга қўшилишни қўллаб-қувватлаган. Украина ва бир қатор Ғарб давлатлари овоз бериш натижаларини тан олмайди ва содир бўлган воқеаларни «аннексия» деб ҳисоблайди. АҚШ Қримнинг Россияга қўшилишини ҳеч қачон тан олмасликка сўз берган. Россия ҳукумати бир неча бор Қрим масаласи тарихан ёпиқ эканини таъкидлаган.
2022 йилнинг март ойида Россия президенти матбуот котиби Дмитрий Песков Қримнинг Россия ҳудуди сифатида тан олиниши Украинадаги босқинни тўхтатиши мумкин бўлган шартлардан бири бўлишини айтган.
Изоҳ (0)