“Daryo” kundaligida 2-noyabrda sodir bo’lgan eng muhim voqealar

“Daryo” nashri 2-noyabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.

Britaniyada “Vagner” guruhi Ukrainadagi xatti-harakatlari tufayli sudga berildi.

Britaniyaning McCue Jury & Partners yuridik firmasi ukrainaliklar nomidan “Vagner” xususiy harbiy kompaniyasi va uning asoschisi Yevgeniy Prigojinga qarshi London oliy sudiga da’vo kiritayotganini ma’lum qildi.Bu guruhning Ukrainadagi xatti-harakatlari bilan bog‘liq. Firma saytida aytilishicha, u Ukrainadagi nizo bilan bog‘liq bir nechta ishlarda qatnashmoqda.

Inews nashrining yozishicha, jarayonni ukrainalik mansabdorlar va Britaniya sobiq bosh vaziri Boris Jonson qo‘llab-quvvatlayapti. Shuningdek, firma xuddi shunday sud ishini AQSHda ham boshlashni rejalashtirmoqda.

Konkord kompaniyasi egasi bo‘lgan Prigojin 2016-yildan buyon AQSH, 2020-yildan buyon esa Yevroittifoq sanksiyalari ostidadir. Vashingtonda u Internet tadqiqotlari agentligi (trollar fabrikasi) va “Vagner”ni nazorat qilishda ayblangan.

U “Vagner”ga aloqadorligini ko‘p marta rad etgan va bunday ayblovlar sababli sudlashgan. Ammo 2022-yil sentabrida u “Vagner” asoschisi ekanini ma’lum qildi. Tashkilotni 2014-yilda, uning so‘zlariga ko‘ra, “Donbassda rus xalqiga nisbatan genotsid” boshlangan vaqtda tuzgan.

Oq uy: AQSH Rossiya bilan ziddiyatga borishni xohlamaydi.

AQSH Ukrainadagi nizo muzokaralar yo‘li bilan hal qilinishiga erishmoqchi, deya ma’lum qildi mamlakat Milliy xavfsizlik kengashi strategik kommunikatsiyalar bo‘yicha koordinatori Jon Kirbi.

Prezident (Jo Bayden)ning maqsadlari boshidanoq yaqqol edi… Biz Rossiya bilan ziddiyatga borishni xohlamaymiz. Bu birinchi o‘rinda, — dedi u.

Vashington bu haqda avval ham gapirgan, uning siyosati Rossiyaga, “shafqatsiz sanksiyalar yordamida” o‘z harbiy operatsiya haqidagi qarori oqibatlarini his qildirishga hamda Ukrainaga gumanitar yordam berishga qaratilganini ta’kidlagan edi.

Boshqa vazifalar qatorida Kirbi NATOning sharqiy qanotini mustahkamlash va Ukrainaga yordam ko‘rsatib, prezident Vladimir Zelenskiy Rossiya bilan “muzokaralar stolida muvaffaqiyatga erishish uchun zarur bo‘lgan barcha ko‘mak va vositalar”ga ega bo‘lishini ta’minlashni aytib o‘tdi.

AQSH Ukraina jang maydonida muvaffaqiyat qozonishi uchun uning o‘zini himoya qilish qobiliyatini qo‘llab-quvvatlashda davom etadi, deb va’da berdi Oq uy vakili.

Eron Saudiya Arabistoniga qarshi harbiy operatsiya boshlashi mumkin — WSJ.

Eron yaqin soatlarda Saudiya Arabistoniga qarshi harbiy operatsiya boshlashi mumkin. Bu haqda The Wall Street Journal manbalariga tayanib xabar berdi.

Nashr ma’lumotlariga ko‘ra, Saudiya Arabistoni AQSH bilan razvedka ma’lumotlarini o‘rtoqlashgan. Unda Eronning qirollikdagi nishonlarga yaqinda hujum qilishi haqida ogohlantirilgan. Bu AQSH va boshqa harbiy kuchlarning Yaqin Sharqdagi jangovar tayyorgarligini oshirishiga olib keladi.

O‘z navbatida, Oq uy Milliy xavfsizlik kengashi Saudiya Arabistonining ogohlantirishlaridan xavotirda ekanini va kerak bo‘lsa Eronga javob berishga tayyorligini bildirgan.

Gazetaning yozishicha, Saudiya Arabistoni rasmiylari Eron go‘yoki qirollikning o‘ziga ham, Erbilga ham hujumlar uyushtirmoqchi ekanini aytgan.

Maqolada aytilishicha, Tehron buni “e’tiborni ichki noroziliklardan chalg‘itish uchun” qilmoqda. Ushbu xabardan biroz vaqt o‘tib Eronning Qum shahridagi “Jamkaron” masjidi gumbazi ustida qizil qasos bayrog‘i ko‘tarildi.

Ayni paytda bayroqning ko‘tarilishi sabablari ma’lum qilinmayapti.

KXDR 10 ta ballistik raketa uchirdi, ulardan biri Janubiy Koreya chegarasini kesib o‘tdi.

Shimoliy Koreya Yapon dengiziga qarata kamida 10 ta har xil turdagi raketalarni uchirdi. Bu haqda janubiy koreyalik harbiylarga tayanib, Yonhap xabar berdi.

Shtab boshliqlari birlashgan qo‘mitasi ma’lumotlariga ko‘ra, parvozlar Shimoliy Koreyaning Vonsan shahridan amalga oshirilgan.

Raketalardan biri Janubiy Koreya bilan dengiz chegarasini kesib o‘tgan, bunday holat 1950—53-yillardagi Koreya urushidan buyon birinchi marta kuzatildi, deya qayd etdi Janubiy Koreya harbiylari.

Snaryad ochiq dengizga, Shimoliy chegara chizig‘idan 26 km janubga kelib tushgan va ushbu orolda havo trevogasi e’lon qilingan. Snaryad Toshkent vaqti bilan 04:51 da aniqlangan.

Pxenyan, shuningdek, har xil turdagi yana bir nechta raketalarni g‘arb va sharqqa uchirgan.Yaponiya Mudofaa vazirligi raketalar tufayli KXDRga norozilik bildirdi. Idora rahbari Yasukadzu Xamada kamida ikkita raketa uchirilgani haqida aytgan.

KXDR ballistik raketalariga javoban, Janubiy Koreya qiruvchilari Shimoliy chegara chizig‘idan shimolda, ochiq dengizga qarata uchta “havo-yer” sinfidagi raketalarni uchirdi.

Janubiy Koreya prezidenti Yun Sok Yol KXDR raketa parvozlarini qoralab, davlat chegarasi buzilganini qayd etdi va “Shimolni provokatsiya badalini to‘lashga majburlash uchun shoshilinch choralar ko‘rishni buyurdi. Bundan tashqari, Milliy xavfsizlik kengashi favqulodda majlisida u harbiylarni Shimoliy Koreya tomonidan yuqori darajali qo‘shimcha provokatsiyalarga tayyor turishga chaqirgan.

Qirg‘izistonda Kampirobod suv omborini himoya qilish bo‘yicha qo‘mita Shavkat Mirziyoyevga murojaat qildi.

Qirg‘izistonda Kampirobod suv omborini himoya qilish bo‘yicha qo‘mita O‘zbekiston prezidenti Shavkat Mirziyoyevga ochiq xat bilan murojaat qildi. U mamlakatlar o‘rtasidagi bitimga aloqador, deb xabar bermoqda “Kaktus.media”.

Murojaatchilar Shavkat Mirziyoyev va Sadir Japarovni Kampirobod/Andijon suv omborini birgalikda boshqarish masalasi va uning oqibatlarini hal qilishga diqqatliroq yondashishga chaqirdi, toki u o‘zaro yaqin ikki xalq o‘rtasidagi bahslar emas, balki rohat-farog‘at manbayiga aylansin, deyiladi murojaatda.

Ularning eslatishicha, Kampirobod/Andijon suv ombori bo‘yicha muhokama o‘tkazish va qaror qabul qilish uchun bor-yo‘g‘i ikkita majlis tashkil qilingan. Muhokama esa jamoatchilik uchun yopiq rejimda o‘tkazilgan, deputatlarga hujjatlar va ma’lumotlar to‘liq berilmagan.

“Fuqarolar, o‘z yerining egalari sifatida, ikki prezident tomonidan imzolanayotgan hujjatlar e’lon qilinishini talab qilishga to‘la haqli, chunki gap ikki mamlakatning uzoq muddatli manfaatlari haqida bormoqda”, — deyiladi murojaatda.