AQSH va Janubiy Koreya qariyb besh yil ichida birinchi keng ko‘lamli qo‘shma Vigilant Storm havo mashg‘ulotlarini boshladi. Unda 240 dan ortiq samolyot, shu jumladan ilg‘or “ko‘rinmas samolyotlar”, xususan, F-35A “ko‘rinmas qiruvchilar” ishtirok etmoqda. Bu haqda Yonhap xabar berdi.
Ushbu mashg‘ulotlar Shimoliy Koreya tomonidan bir qator raketalar uchirilganidan so‘ng, qolaversa, Pxenyan yaqin orada yadroviy sinov o‘tkazishi mumkinligi haqidagi xavotirlar fonida amalga oshirilmoqda. Janubiy Koreya mashg‘ulotlarga 140 ta samolyot jo‘natadi. AQSH esa Yaponiyaning Okinava orolida joylashgan F-35B “ko‘rinmas samolyotlar”ini taqdim etadi.
Mashqlar 4-noyabrga qadar davom etadi, deb xabar berdi AQSH Tinch okean floti harbiy havo kuchlari matbuot xizmati. Ularda AQSH va Janubiy Koreya harbiy-havo kuchlari, dengiz piyodalari korpusi, AQSH dengiz floti va armiyasining “minglab” harbiy xizmatchilari ishtirok etadi. Bundan tashqari, Avstraliya qirollik harbiy-havo kuchlarining 33-sonli otryadi mashqlar uchun KC-30A zapravkachi samolyotini jo‘natadi.
Mashg‘ulotlar davomida jami 1600 dan ortiq harbiy parvozlarni amalga oshirish rejalashtirilgan, Koreya Aerokosmik operatsiyalar markazi esa operatsion imkoniyatlarni oshirish uchun kuchlarni boshqaradi.
Yonhap xabariga ko‘ra, Janubiy Koreya va Qo‘shma Shtatlar bunday yirik qo‘shma havo o‘quv dasturini 2015-yilda Vgilant ACE nomi ostida boshlagan. U 2017-yilning oxirigacha, o‘sha paytdagi Mun Chje In ma’muriyati Koreyalararo yarashuv bo‘yicha faol kampaniyani tashkil etgunga qadar har yili o‘tkazilgan.
28-oktabr kuni Janubiy Koreya va AQSHning yillik keng ko‘lamli “Xoguk” mashg‘ulotlari nihoyasiga yetgan edi, uning doirasida, jumladan, Yapon dengiziga desant qo‘nish amaliyoti o‘tkazildi. Manyovrlarda 6000 dan ortiq harbiy xizmatchi, 40 ta desant amfibiya-mashinasi, 50 ta samolyot va vertolyot, o‘nta kema ishtirok etdi.
Izoh (0)