Futbol bo‘yicha O‘zbekiston Kubogi finalida “Navbahor” va “Nasaf” jamoalari 30-oktabr, yakshanba kuni bahs olib boradi.
Uchrashuv oldidan jamoalar murabbiylari ishtirokida matbuot anjumani tashkil etildi.
Buxoro shahrida bo‘lib turganimizdan xursandmiz. Final – bu futbol bayrami. Ertangi final biz uchun juda ham muhim ahamiyat kasb etadi.Tarkibda o‘zgarish bo‘lishi haqida
O‘zgarish bor. Bilmadim, ammo, aytishim mumkin, mavsum davomida jamoaning o‘zagi bo‘lgan, yil davomida o‘z darajasini ko‘rsatayotgan o‘yinchilar uchrashuvga tayyor.
“Navbahor”da ishlash haqida
Namanganda ishlash oson ish emas. Ham murabbiy, ham futbolchi sifatida. “Navbahor”da ishi yurishmagan, ammo, boshqa jamoada ishlab ketgan insonlar bor. Bu yerda asab mustahkam bo‘lishi kerak. Buni tushuntirishga harakat qilaman. Klub o‘z an’analariga ega. Ammo, bu an’analar 24 yildan buyon amalga oshmay kelayapti. Shuni amalga oshirish harakatidamiz. Balki bizgacha ham kimdir harakat qilgandir va bosim tufayli bunga erisha olmagan bo‘lishi mumkin. Bugun “Navbahor” sharafini himoya qilayotganlar esa, bosimlarga bardosh bera oladigan insonlardir. Ularda xarakter va sifat bor. Asosiysi, muxlislarni xursand qilishni uddalay olyapmiz va bu meni quvontirayapti.
Mavsum davomida o‘zimiz yarata olgan vaziyatlardan unumliroq foydalana olganimizda, boshqa vaziyatda turgan bo‘lar edik. O‘zimiz bilan teng saviyali raqiblarni mag‘lub eta oldik. Biroz darajasi pastroq jamoalar bilan esa, ko‘p ochko yo‘qotdik. Buning sababini bilamiz, nima qilish kerakligini ham bilamiz. Bu haqda gapirish hozirda biroz erta. Kayfiyatimiz yaxshi. Oldimizdagi uchta o‘yinda ham maksimum natija ko‘rsatishga harakat qilamiz.
Samvel Babayan, “Navbahor” bosh murabbiyi
Bugun stadionga bordik va maydonning ajoyib holatda ekaniga guvoh bo‘ldik. Ertaga maydonda haqiqiy jang bo‘ladi deb o‘ylayman. Chunki, hozirgi kunda mamlakatning eng kuchli jamolaridan hisoblangan ikki klub finalda to‘qnash keladi. Biz bu o‘yinga ancha yaxshi tayyorgarlik ko‘rdik. Bunday muhim o‘yinlarda qatnashish bo‘yicha tajribaga egamiz. Bizning asosiy maqsadimiz ertangi o‘yinda ijobiy natija ko‘rsatib, muxlislarni xursand qilish.Husayn Norchayev finalda ishtirok etmasligi haqida
Husayn Norchayevning ertangi o‘yinda qatnasha olmasligi – katta yo‘qotish. Bilasiz, Husayn oxirgi o‘yinlarida bizga gollar bilan emas mehnatlari bilan katta yordam berayotgandi. Afsuski, ertaga Norchayev bizga yordam bera olmaydi. Biz yarim finalda ham yo‘qotish bilan (Oybek Bozorov) o‘ynadik. Shuning uchun o‘z zaxira imkoniyatimizdan yaxshiroq foydalanishga harakat qilamiz. Balki taktik chiziqlarni o‘zgartirishga to‘g‘ri kelar, lekin ertangi uchrashuvga tayyormiz.
Jamoaning ruhiy tayyorgarligi haqida
Ruhiy tayyorgarlik har doim muhim hisoblanadi. Biz o‘tgan o‘yinni esdan chiqardik, albatta, ikki ochko muhim edi, lekin boshqa vaziyatlardan ham foydalana olmadik. O‘tgan narsani qaytarib bo‘lmaydi, shuning uchun bor e’tiborimizni ertangi uchrashuvga qaratganmiz. Asosiy maqsadimiz Kubokda ham, Superligada ham maksimal natija qayd etish. Chunki har ikki frontda ham maqsadimizga juda yaqin turibmiz.
Raqib haqida
“Navbahor” haqida ortiqcha gapirish shart emas. Klub bu mavsum har yilgidanda kuchli. Bu jamoaning o‘yinlarida ham, boshqa masalalarda ham ko‘rinib turibdi. Raqibdan kelib chiqib aytganda ertangi o‘yin oson bo‘lmasligi aniq. Chunki “Navbahor” himoyalanishni ham, hujum qilishni ham yaxshi biladi. Xuddi shuningdek biz ham ertaga o‘z o‘yinimiz orqali ijobiy natija qayd etmoqchimiz.
“Nasaf” penaltilar seriyasiga tayyorligi haqida
Penaltilar seriyasiga ham tayyorgarlik ko‘rganmiz. Marko Stonoyevich agar o‘ziga ishonsa, unga penalti tepish imkoniyatini beramiz. Agar ertangi uchrashuv penaltilar seriyasigacha boradigan bo‘lsa, bizda bu ishni bajaradigan o‘yinchilar talaygina.
Menimcha ikki jamoa ham ehtiyotkor o‘ynaydi. Chunki bu yerda ikkinchi uchrashuv yo‘q va boshqa imkoniyat bo‘lmaydi. Qancha vaqt o‘ynashimiz haqida hech narsa deya olmayman, lekin ertaga ikki jamoa ham natija uchun harakat qiladi.
Ro‘ziqul Berdiyev, “Nasaf” bosh murabbiyi
Izoh (0)