Dmitriy Gordon O‘zbekistonda Eron dronlari ishlab chiqarilishi haqida xato gapirgani uchun uzr so‘radi

Ukrainalik jurnalist Dmitriy Gordon Eron dronlari O‘zbekistonda ishlab chiqarilgani haqidagi so‘nggi bayonotiga izoh berdi. Uning so‘zlariga ko‘ra, aslida u Tojikistonni nazarda tutgan, lekin adashish sababli O‘zbekiston nomini aytib yuborgan.

“Aslida men O‘zbekistonni emas, Tojikistonni nazarda tutdim. Tilimdan esa O‘zbekiston so‘zi chiqdi. O‘zbekistonda dron zavodi borligi ma’lum, ammo uning Eronga aloqasi borligi haqida hech qanday dalil yo‘q. Shuning uchun men Tojikistonni nazarda tutdim. Shuni takroran aytmoqchimanki, Tojikistonda bunday dronlar ishlab chiqarilmoqda, keyinchalik u rossiyaliklar ukrainaliklarni o‘ldirishida foydalanilmoqda”, — dedi u.

Jurnalist Tojikiston Tashqi ishlar vazirligidan bu ma’lumot haqiqatga to‘g‘ri kelmaydigan deb topilsa, rad etishni so‘radi.

“Men chin dildan hurmat qiladigan va sevadigan o‘zbeklar, O‘zbekiston fuqarolari haqida nima deyishim mumkin? Bu — o‘zining mehmondo‘stligi va samimiyligi bilan mashhur o‘lka. Ikkinchi Jahon urushi paytida ko‘plab ukrainaliklarga boshpana bo‘lgan yer. Yana bir bor takror aytmoqchimanki, Eron dronlari u yerda ishlab chiqarilgani haqida e’lon qilgan ma’lumotlarga O‘zbekistonning hech qanday aloqasi yo‘q”, — dedi Dmitriy Gordon.

• “O‘zbekistonni Putin rejimiga sherik qilib ko‘rsatganingiz uchun uzr so‘rashingiz kerak” — faollar Dmitriy Gordonga keskin munosabat bildirdi
• Ukrainada qo‘llanayotgan Eron dronlari O‘zbekistonda ishlab chiqarilayotgani rad etildi
• "Tashqi ishlar va Mudofaa vazirliklari bu tuhmatni rasman rad etishi kerak" — Alisher Qodirov Dmitriy Gordonning so‘zlariga munosabat bildirdi
• Tashqi ishlar vazirligi Ukraina hukumatiga dronlar masalasida murojaat yo‘lladi