Дмитрий Гордон Ўзбекистонда Эрон дронлари ишлаб чиқарилиши ҳақида хато гапиргани учун узр сўради

Украиналик журналист Дмитрий Гордон Эрон дронлари Ўзбекистонда ишлаб чиқарилгани ҳақидаги сўнгги баёнотига изоҳ берди. Унинг сўзларига кўра, аслида у Тожикистонни назарда тутган, лекин адашиш сабабли Ўзбекистон номини айтиб юборган.

«Аслида мен Ўзбекистонни эмас, Тожикистонни назарда тутдим. Тилимдан эса Ўзбекистон сўзи чиқди. Ўзбекистонда дрон заводи борлиги маълум, аммо унинг Эронга алоқаси борлиги ҳақида ҳеч қандай далил йўқ. Шунинг учун мен Тожикистонни назарда тутдим. Шуни такроран айтмоқчиманки, Тожикистонда бундай дронлар ишлаб чиқарилмоқда, кейинчалик у россияликлар украиналикларни ўлдиришида фойдаланилмоқда», — деди у.

Журналист Тожикистон Ташқи ишлар вазирлигидан бу маълумот ҳақиқатга тўғри келмайдиган деб топилса, рад этишни сўради.

«Мен чин дилдан ҳурмат қиладиган ва севадиган ўзбеклар, Ўзбекистон фуқаролари ҳақида нима дейишим мумкин? Бу — ўзининг меҳмондўстлиги ва самимийлиги билан машҳур ўлка. Иккинчи Жаҳон уруши пайтида кўплаб украиналикларга бошпана бўлган ер. Яна бир бор такрор айтмоқчиманки, Эрон дронлари у ерда ишлаб чиқарилгани ҳақида эълон қилган маълумотларга Ўзбекистоннинг ҳеч қандай алоқаси йўқ», — деди Дмитрий Гордон.

• «Ўзбекистонни Путин режимига шерик қилиб кўрсатганингиз учун узр сўрашингиз керак» — фаоллар Дмитрий Гордонга кескин муносабат билдирди
• Украинада қўлланаётган Эрон дронлари Ўзбекистонда ишлаб чиқарилаётгани рад этилди
• "Ташқи ишлар ва Мудофаа вазирликлари бу туҳматни расман рад этиши керак" — Алишер Қодиров Дмитрий Гордоннинг сўзларига муносабат билдирди
• Ташқи ишлар вазирлиги Украина ҳукуматига дронлар масаласида мурожаат йўллади