O‘zbekistonda yosh IT mutaxassislariga iste’mol krediti ajratish tartibi tasdiqlandi

Vazirlar Mahkamasining “Yoshlarning zamonaviy bilim va kasb-hunar egallash imkoniyatlari kengaytirilishi munosabati bilan O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish to‘g‘risida”gi qarori qabul qilindi.

Hujjat bilan amaldagi qonunchilikka yoshlar uchun kompyuter xarid qilish maqsadida iste’mol kreditlarini ajratish tartibini belgilovchi o‘zgartirishlar kiritish nazarda tutilgan.

Ma’lumot uchun, 2022-yil 1-noyabrdan boshlab AT “Xalq banki”, AT “Aloqa bank” va “Mikrokreditbank” ATB ishtirokchi sertifikatini olgan yoki ushbu o‘quv kurslarini so‘nggi 6 oyda muvaffaqiyatli tamomlagan yoshlarga kompyuter (shu jumladan, O‘zbekistonda ishlab chiqarilmagan) xarid qilish uchun BHMning 25 baravaridan ko‘p bo‘lmagan miqdorda iste’mol kreditlari ajratishni boshlaydi.

Bunda kompyuter xarid qilish uchun ajratiladigan iste’mol kreditlari bo‘yicha foiz to‘lovlarining Markaziy bank asosiy stavkasining 1,5 baravarigacha qismi Yoshlar ishlari agentligining Yoshlarga oid davlat siyosatini qo‘llab-quvvatlash jamg‘armasi hisobidan kompensatsiya qilinadi.

Tartibga ko‘ra:

• “Bir million dasturchi” loyihasi doirasida o‘quv kurslarini muvaffaqiyatli tamomlagan, shuningdek, IT-park rezidentining o‘quvchisi yoki bitiruvchisi bo‘lgan 31 yoshga to‘lmagan O‘zbekiston fuqarosi yoki fuqaroligi bo‘lmagan shaxs (14 yoshdan 16 yoshgacha bo‘lgan shaxs nomidan uning vakili) tegishli sertifikat berilgandan boshlab 6 oy mobaynida istalgan davlat xizmatlari markaziga yoki YAIDXP orqali sertifikatni ilova qilgan holda murojaat etadi;
• Yoshlar ishlari agentligi 5 ish kuni ichida ko‘rsatilgan sertifikatni verifikatsiyadan o‘tkazib, ma’lumotlar tasdiqlanganda kompensatsiya to‘lab berish haqida ma’lumotnoma beradi va murojaatchilar ro‘yxatini avtomatik tarzda bankka taqdim etadi;
• AT “Xalq banki”, AT “Aloqa bank” va “Mikrokreditbank” ATB kelib tushgan murojaatlarni ko‘rib chiqadilar va ular ma’qullangan taqdirda tegishli kompyuter texnikasini yetkazib beruvchilarga kompyuter qiymati summasini o‘tkazib beradi.