Kompaniyaning moliyaviy hisoboti e’lon qilinganidan keyin Meta aksiyalari qiymati deyarli 20 foizga arzonlashdi. Bu haqda Daily Mail xabar bermoqda.
Facebook, Instagram va WhatsApp’ning bosh tashkiloti bo‘lgan Meta uchinchi chorak uchun moliyaviy hisobotini e’lon qildi, unda daromad va foydaning kamaygani, xarajatlarning o‘sishi qayd etilgan.
Bundan tashqari, metaverseni boshqarish uchun mas’ul bo‘lgan Reality Labs kompaniyasining yo‘qotishlari ham 1 milliard dollardan oshgan.
Meta’ning iyul—sentabr oylaridagi sof daromadi 4,39 milliard dollarni yoki har bir aksiya uchun 1,64 dollarni tashkil etgan. O‘tgan yili bu ko‘rsatkich 9,19 milliard dollar yoki har bir aksiya uchun 3,22 dollarni tashkil qilgan.
Hisobot e’lon qilinganidan so‘ng kompaniya aksiyalari narxi savdolarda 19,7 foizga tushib ketdi, bu 2016-yildan beri eng past daraja. Kompaniyaning bozor qiymati 65 milliard dollardan ko‘proqqa qisqardi.
Investorning yo‘qotishlar haqidagi xavotirlari bilan yuzma-yuz kelgan Meta kompaniyasi rahbari Mark Sukerberg metaverse va boshqa “eksperimental garovlar”ga sarflangan mablag‘lar o‘z samarasini bera boshlashiga ishonch bildirdi.
Vaqt o‘tib, bu bizning biznesimiz kelajagiga juda muhim sarmoya bo‘ladi. Biz qisqa muddatli daromad muammolariga duch kelsak-da, daromadning kuchli o‘sishiga qaytish uchun asoslar mavjud, — dedi u.
Kompaniyaning to‘rtinchi chorakdagi prognozidan ham investorlarning hafsalasi pir bo‘ldi. Joriy chorakdagi daromad 30—32,5 milliard dollarni tashkil qilishi kutilmoqda. Mutaxassislar bu ko‘rsatkichni o‘rtacha 32,3 milliard dollar deb taxmin qilmoqda.
2022-yil yozida Facebook ijtimoiy tarmog‘iga egalik qiluvchi Amerikaning Meta Platforms transmilliy xolding kompaniyasi ilk bor choraklik daromadning pasayishini qayd etgan edi.
Izoh (0)