O‘tgan haftada AQSH kuniga 11 million barreldan ortiq xom neft va neft mahsulotlarini eksport qildi. Bu Amerika neft eksportining rekord hajmi. Bu haqda The Financial Times (FT) gazetasi AQSH Energetika vazirligining Energetika axboroti boshqarmasi ma’lumotlariga tayanib xabar berdi.
O‘tgan haftada AQSHdan neft va neft mahsulotlari eksporti hajmi kuniga 2 million barrelga oshdi, deb yozadi FT.
Umuman olganda, hafta yakunlariga ko‘ra, Qo‘shma Shtatlar kuniga 11,4 million barrel energiya eksport qilgan.
O‘sish AQSH rasmiylarining eksportni qisqartirish va ichki talabni qoplash uchun mamlakatdagi energiya zaxiralarini ko‘paytirish chaqiriqlari fonida kuzatilmoqda.
Shuning uchun rasmiylar mamlakatda energiya narxining oshishiga qarshi kurashishga harakat qilmoqda, deb yozadi gazeta.
Oktabr oyida AQSH prezidenti Jo Bayden energetika kompaniyalarini oxirgi iste’molchilar uchun yonilg‘i narxini pasaytirishga chaqirdi.
Reuters agentligiga ko‘ra, Bayden neft eksportiga cheklovlar e’lon qilishi mumkin. Bu OPEK+ning neft qazib olishni kuniga 2 million barrelga qisqartirish haqidagi qarori fonida sodir bo‘ldi.
Izoh (0)