Toshkent shahrida muqaddam bir necha marotaba jinoyat sodir etgan shaxslar yana talonchilik jinoyatini sodir etdi. Bu haqda Oliy sud xabar qildi.
Qayd etilishicha, 44 yoshli fuqaro jinoiy sheriklari — 26, 27 va 41 yoshli shaxslar (barchasi muqaddam bezorilik, talonchilik, firibgarlik jinoyatlari uchun sudlangan) bilan oldindan jinoiy til biriktirib, bir guruh bo‘lib olishadi. Dorixona rastasi eshigini buzgan holda ushbu joyga g‘ayriqonuniy ravishda kirib, mazkur dorixonada sotuvchi bo‘lib ishlovchi erkakka hayot yoki sog‘liq uchun xavfli bo‘lmagan zo‘rlik ishlatish bilan qo‘rqitishadi. Uning narxi 2 million so‘mlik telefon apparati va dorixona kassasidan 1 million so‘m pullarni ochiqdan ochiq talon-toroj qilib, hodisa joyidan yashirinishgan.
Sudda so‘roq qilingan sudlanuvchilar e’lon qilingan aybga qisman iqrorlik bildirgan. 44 yoshli sudlanuvchining sudda bergan ko‘rsatmasiga ko‘ra, u dorixonadan oldindan “Zardeks”, “Regapen” dorilarini olib kelgan.
“O‘sha kuni uch nafar tanishlarim bilan dorixonaga kirdik. 27 yoshli tanishimga dori olib bermoqchi bo‘ldim. Biroq sotuvchi oldingi qarzingizni bering, degani uchun u bilan tortishib qoldik. Shu payt 27 yoshli tanishimning jahli chiqib, rastadan ichkariga kirdi. Sotuvchini bir shapaloq urdi, u bizdan qo‘rqib orqa eshikdan qochib ketdi. Sotuvchining telefoni va kassada turgan 900 ming so‘mga yaqin pullarni oldik. Pullarni bir maromda tekislab berish uchun 26 yoshli tanishimga berdim. So‘ng videokuzatuv kameralarini uzib tashladim. Kamerani uzishga chiqayotgan vaqtimda men bilan kirgan 27 va 41 yoshli tanishlarim dorixonadan chiqib ketdi. U yerdan chiqib, 41 yoshli tanishimning avtomashinasida 27 yoshli tanishim bilan birga Yangiobod bozoriga bordik. Bozorda telefon apparatini notanish shaxsga 800 ming so‘mga sotib yubordik. Ushbu telefon apparati sotuvchiniki ekanidan boshqa sheriklarimning xabari bo‘lmagan. Sotuvchini o‘ldirish yoki unga zo‘rlik ishlatish bilan qo‘rqitmadik”, — deya qilmishidan pushaymonligini bildirgan u.
Sud majlisida jabrlanuvchi quyidagilarni bayon qildi...
“Sudlanuvchilarni ilgari tanimaganman. Dorixonaga sotuvchi bo‘lib ishga kirganimga endigina ikki kun bo‘lgandi. Soat taxminan 15:30 da dorixonaga notanish bo‘lgan besh nafar shaxs kirib keldi. Ulardan biri, menga keyinchalik ma’lum bo‘lgan 27 yoshli sudlanuvchi rasta eshigini kuch bilan tortib ochib, ichkariga kirib meni bir tarsaki urib, do‘q-po‘pisa qilib stulga o‘tkazib qo‘ydi. So‘ng ikkinchi sherigi – 44 yoshli sudlanuvchi ham rasta ichkarisiga kirib keldi. 27 yoshli sudlanuvchi qo‘limdan telefon apparatimni olib qo‘ydi. Qo‘rqib ketganimdan orqa eshikdan ko‘chaga qochib chiqib ketdim. Oradan bir oz vaqt o‘tgach, dorixonaga qaytib kelgan vaqtimda, ushbu shaxslar taxminan 1 million so‘m savdo pullarini olib chiqib ketishganini bildim. Keyin holat yuzasidan dorixona xo‘jayini va 102 raqamiga qo‘ng‘iroq qildim. Voqea payti qo‘rqqanim sababli sudlanuvchilarning yana ikki nafari nima harakat qilganiga e’tibor bermadim. Hech kimga pardani yopishni aytmadim. Sudlanuvchilar mendan kuchli ta’sir qiluvchi dori so‘rashdi, rasta ichiga kirishgach, pul yoki boshqa narsa talab qilishmadi. Faqatgina o‘tirishimni aytib, do‘q-po‘pisa qilishdi. 27 yoshli sudlanuvchi qo‘lini orqasiga qilganida biror buyum bilan urib qolmasin deb qo‘rqib, qochib chiqib ketdim”.
Jabrlanuvchi sudda yetkazilgan zarar to‘liq qoplangani va sudlanuvchilarga nisbatan qonuniy chora ko‘rishni so‘rab ko‘rsatma bergan.
Sud hukmi o‘qildi. Unga ko‘ra, 27, 41 va 44 yoshli sudlanuvchilar Jinoyat kodeksining 166-moddasi (talonchilik) 3-qismining “b” bandida nazarda tutilgan jinoyatni sodir qilganlikda aybli deb topildi va ularga 5 yil, 26 yoshli sudlanuvchiga esa 2019-yildagi hukmga ko‘ra tayinlangan jazoning o‘talmagan qismini qisman qo‘shish yo‘li bilan uzil-kesil 5 yil 2 oy ozodlikdan mahrum qilish jazosi tayinlandi.
Izoh (0)