Rossiya mudofaa vaziri Sergey Shoygu Xitoy va Hindistondagi hamkasblari bilan muzokaralar o‘tkazdi. Hindiston mudofaa vaziri Rajnat Singx bilan telefon orqali suhbat chog‘ida Shoygu “Kiyevning ‘iflos bomba’ yordamida ehtimoliy provokatsiyalaridan xavotir bildirdi”. U Xitoy mudofaa vazirligi rahbari Vey Fenxe bilan suhbatda ham shu mavzuni ko‘targan.
Rossiya Mudofaa vazirligi suhbat tafsilotlarini oshkor qilmayapti. “Rossiyskaya gazeta”ning yozishicha, Shoygu hamkasblariga “iflos bomba”, ya’ni radioaktiv moddalardan iborat bombadan foydalanish ehtimoli bilan bog‘liq “Ukraina provokatsiyalari” yuzasidan xavotir bildirgan.
Avvalroq, 23-oktabr kuni Shoygu Fransiya, Turkiya va Buyuk Britaniya mudofaa vazirliklari rahbarlari bilan “Ukraina tomonidan ehtimoliy provokatsiyalar”ni muhokama qilgan edi. Ukrainadagi vaziyat bo‘yicha Sergey Shoygu Pentagon rahbari Lloyd Ostinga ham telefon qilgan.
AQSH, Fransiya va Buyuk Britaniya qo‘shma bayonot berib, Rossiyaning “iflos bomba” haqidagi da’vosini yolg‘on deb atadi. Kiyev barcha ayblovlarni rad etmoqda. Shu fonda Atom energiyasi bo‘yicha xalqaro agentlik missiyasi tekshiruv bilan Ukrainadagi yadroviy inshootlarga tashrif buyurmoqda.
“Iflos bomba” — radioaktiv moddalardan tarkib topgan, biroq oddiy portlovchi moddaga asoslangan, ya’ni mustaqil yadroviy reaksiyaga qodir bo‘lmagan faraziy portlovchi qurilma. “Iflos bomba” odatda terrorchilik hujumining ehtimoliy turlaridan biri deb hisoblanadi. Bunday qurollardan foydalanilgan hududlar kamida 30—50 yil davomida yaroqsiz bo‘ladi.
Izoh (0)