Россия мудофаа вазири Сергей Шойгу Хитой ва Ҳиндистондаги ҳамкасблари билан музокаралар ўтказди. Ҳиндистон мудофаа вазири Ражнат Сингх билан телефон орқали суҳбат чоғида Шойгу «Киевнинг ‘ифлос бомба’ ёрдамида эҳтимолий провокацияларидан хавотир билдирди». У Хитой мудофаа вазирлиги раҳбари Вей Фенхе билан суҳбатда ҳам шу мавзуни кўтарган.
Россия Мудофаа вазирлиги суҳбат тафсилотларини ошкор қилмаяпти. «Российская газета»нинг ёзишича, Шойгу ҳамкасбларига «ифлос бомба», яъни радиоактив моддалардан иборат бомбадан фойдаланиш эҳтимоли билан боғлиқ «Украина провокациялари» юзасидан хавотир билдирган.
Аввалроқ, 23 октябрь куни Шойгу Франция, Туркия ва Буюк Британия мудофаа вазирликлари раҳбарлари билан «Украина томонидан эҳтимолий провокациялар»ни муҳокама қилган эди. Украинадаги вазият бўйича Сергей Шойгу Пентагон раҳбари Ллойд Остинга ҳам телефон қилган.
АҚШ, Франция ва Буюк Британия қўшма баёнот бериб, Россиянинг «ифлос бомба» ҳақидаги даъвосини ёлғон деб атади. Киев барча айбловларни рад этмоқда. Шу фонда Атом энергияси бўйича халқаро агентлик миссияси текширув билан Украинадаги ядровий иншоотларга ташриф буюрмоқда.
«Ифлос бомба» — радиоактив моддалардан таркиб топган, бироқ оддий портловчи моддага асосланган, яъни мустақил ядровий реакцияга қодир бўлмаган фаразий портловчи қурилма. «Ифлос бомба» одатда террорчилик ҳужумининг эҳтимолий турларидан бири деб ҳисобланади. Бундай қуроллардан фойдаланилган ҳудудлар камида 30—50 йил давомида яроқсиз бўлади.
Изоҳ (0)