Ўзбекистондаги мавжуд мактабларнинг 7111 таси кўмир ёқилғиси ёрдамида иситилади. Бу ҳақда бугун Халқ таълими вазири Бахтиёр Саидов томонидан видеоконференцалоқа орқали ҳудудий халқ таълими бошқармалари раҳбарлари иштирокида ўтказилган йиғилишда айтилган.
Мазкур йиғилиш ҳақида «Дарё»га батафсил маълумот берган вазирлик ахборот хизмати раҳбари Лайло Рустамованинг хабар беришича, вазир видеоконференцалоқа орқали ҳудудий халқ таълими бошқармалари раҳбарлари билан мулоқот ўтказиб, таълим сифати ва мазмуни, ўқув муассасаларида куз-қиш мавсумига тайёргарлик, раҳбарлар масъулияти, фуқароларнинг мурожаатлари билан ишлаш масалаларини муҳокама қилган.
Йиғилишда таъкидланишича, мамлакатимиздаги мавжуд 10 104 та умумтаълим мактабининг 7 111 таси кўмир ёқилғиси ёрдамида, қолганлари табиий газ, суюқ ёқилғи ҳамда электр энергияси билан иситилади. Ҳозирда кўмир ёқилғиси билан иситиладиган мактабларга тўлиқ равишда кўмир маҳсулотлари етказиб берилган. Аммо тегишли ташкилотлар билан ҳамкорликда жойлардаги қатор мактабларда ўтказилган ўрганишлар давомида кўмир маҳсулотларини сақлаш, иситиш қозонларининг яроқлилик ҳолати талаб даражасида эмаслиги танқид остига олинди, — дейди Лайло Рустамова.
Қўшимча қилинишича, табиий газ, кўмир, суюқ ёқилғи ҳамда электр энергияси ёрдамида иситиладиган мактабларнинг иситиш тизимини қайтадан таҳлил қилиб чиқиш бўйича бошқармалар қошида махсус штаблар, соҳа ходимлари ва фуқароларнинг бу борадаги мурожаатларини қабул қилишга мўлжалланган Call-марказлар ташкил этилиши режалаштирилган.
Хабарингиз бор, 2022 йил 10 июнь куни президентимиз раҳбарлигида ўтказилган видеоселектор йиғилишида белгиланган вазифалар ижросини таъминлаш мақсадида умумтаълим мактабларга қуёш электр панелларини ўрнатиш ишлари олиб борилмоқда. Мазкур ташаббус натижасида мактабларнинг электр энергияси сарфини сезиларли даражада камайтириши ва мактаб биноларини узлуксиз электр энергия билан таъминлашда катта хизмати қилиши айтиб ўтилди, — дейди вазирлик масъули.
Мавзуга доир: Ўзбекистондаги мактабларда қуёш панеллари ўрнатилмоқда
Изоҳ (0)