Rossiyaning Orlov viloyatidagi chiqindilarni qayta ishlash korxonada ishlayotgan O‘zbekiston fuqarolari safarbarlik uchun chaqiruv olgandi. Tashqi mehnat migratsiyasi agentligi bunga munosabat bildirdi.
Agentlik axborotiga ko‘ra, Orlov viloyatida vaqtincha mehnat faoliyatini amalga oshirayotgan o‘zbekistonlik mehnat migrantlarini safarbarlikka jalb qilish uchun chaqiruvlar kelgani haqida tarqalgan xabarlar munosabati bilan, O‘zbekistonning Moskvadagi elchixonasi va Tashqi mehnat migratsiyasi agentligining Rossiyadagi vakolatxonasi vakillaridan iborat ishchi guruh tomonidan nazoratga olindi va tashkilot rahbariyati hamda fuqarolar bilan aloqa o‘rnatilib, voqea joyiga yo‘l olindi.
O‘rganishlar natijasi yuzasidan qo‘shimcha ma’lumot beriladi.
“Shu munosabat bilan Rossiyadagi o‘zbekistonlik mehnat migrantlaridan harbiy harakatlarga aralashmaslikni, nizoli hududlarga bormaslikni hamda bunday holatlarga duch kelsa, Tashqi mehnat migratsiyasi agentligi va boshqa vakolatli tashkilotlaga murojaat qilishlarini so‘raymiz”, — deyiladi agentlik xabarida.
O‘zi nima gap?
Orlovdagi “EkoSiti” aksiyadorlik jamiyati chiqindilarni qayta ishlash korxonasi xodimlari 25-oktabr, seshanba safarbarlik uchun chaqiruv olgan. Muddatli harbiy xizmatga chaqirilganlar orasida 50 kishi bo‘lib, ularning yarmi O‘zbekiston fuqarolari bo‘lgan. Ertasiga barcha ishchilar o‘z xizmat joylariga qaytarilgan.
Keyinroq Orlov harbiy komissarligi vaziyatga izoh bergan. Unga ko‘ra, 25-oktabr kuni “EkoSiti” AJ korxonasiga 50 ta chaqiruv qog‘ozi yuborilgan. Komissiyaga korxonaning 26 nafar xodimi yetib kelgan, ulardan 23 nafari chet el fuqarolari, “B” toifali fuqaro va bir kishi sog‘lig‘idan shikoyat qilgan. Yana bir chaqiruv varaqasi 27-oktabr kuni harbiy komissiyaga kelgan sana bilan qayta rasmiylashtirilgan. Ya’ni, “EkoSiti” OAJ ishchilari bo‘lgan 27 nafar rossiyalikdan faqat uchtasi xizmatga chaqirilgan. Xorijiy fuqarolar hujjatlar tekshirilgandan so‘ng qo‘yib yuborilgan.
Izoh (0)