Janubiy Koreyaning Seul shaharida Milliy Olimpiya qo‘mitalari assotsiatsiyasi (ANOC) Bosh assambleyasi doirasida Markaziy Osiyo mamlakatlari Olimpiya qo‘mitalari yig‘ilish o‘tkazdi. Bu haqda Qozog‘iston Milliy Olimpiya qo‘mitasi xabar qilmoqda.
Yig‘ilishda Osiyo Olimpiya qo‘mitasi, Qozog‘iston, Qirg‘iziston, Tojikiston va O‘zbekiston MOQ vakillari ishtirok etdi. Kun tartibida ikkita mavzu ko‘tarildi, ularning asosiysi Markaziy Osiyo o‘yinlarini qaytadan boshlash edi.
Tomonlar birgalikda sport dasturini ishlab chiqish, shuningdek, keyingi ikki yil ichida o‘yinlarni tashkillashtirishga kelishib oldi. Turnir o‘tkaziladigan mamlakat va sana keyinroq aniqlanadi. Undan tashqari, tomonlar o‘rtasida 2023-yilda Parij—2024 Olimpiya o‘yinlari yo‘lida saralash bosqichida ishtirok etadigan mamlakatlarning individual va birgalikdagi tayyorgarliklarini takomillashtirish mexanizmlarini ishlab chiqish bo‘yicha kelishuvga erishildi.
Ma’lumot uchun, Markaziy Osiyo o‘yinlari 1995—2003-yillar oralig‘ida o‘tkazilgan. O‘zbekistonning Toshkent shahri 1995-yilgi ilk musobaqaga mezbonlik qilgan. 2005-yilgi o‘yinlar mezbonligi ham Toshkentga berilgan, biroq musobaqa o‘tkazilmay qolgandi.
Izoh (0)