Жанубий Кореянинг Сеул шаҳарида Миллий Олимпия қўмиталари ассоциацияси (ANOC) Бош ассамблеяси доирасида Марказий Осиё мамлакатлари Олимпия қўмиталари йиғилиш ўтказди. Бу ҳақда Қозоғистон Миллий Олимпия қўмитаси хабар қилмоқда.
Йиғилишда Осиё Олимпия қўмитаси, Қозоғистон, Қирғизистон, Тожикистон ва Ўзбекистон МОҚ вакиллари иштирок этди. Кун тартибида иккита мавзу кўтарилди, уларнинг асосийси Марказий Осиё ўйинларини қайтадан бошлаш эди.
Томонлар биргаликда спорт дастурини ишлаб чиқиш, шунингдек, кейинги икки йил ичида ўйинларни ташкиллаштиришга келишиб олди. Турнир ўтказиладиган мамлакат ва сана кейинроқ аниқланади. Ундан ташқари, томонлар ўртасида 2023 йилда Париж—2024 Олимпия ўйинлари йўлида саралаш босқичида иштирок этадиган мамлакатларнинг индивидуал ва биргаликдаги тайёргарликларини такомиллаштириш механизмларини ишлаб чиқиш бўйича келишувга эришилди.
Маълумот учун, Марказий Осиё ўйинлари 1995—2003 йиллар оралиғида ўтказилган. Ўзбекистоннинг Тошкент шаҳри 1995 йилги илк мусобақага мезбонлик қилган. 2005 йилги ўйинлар мезбонлиги ҳам Тошкентга берилган, бироқ мусобақа ўтказилмай қолганди.
Изоҳ (0)