Украина ноқонуний равишда аннексия қилинган Қрим устидан суверенитетини, албатта, қайта тиклайди. Бу ҳақда Украина президенти Владимир Зеленский ватандошларига видеомурожаатида айтди.
«Биз Қримни, албатта, озод қиламиз. Мамлакатимизнинг ушбу бўлагини нафақат умумукраина, балки умумевропа заминига қайтарамиз», — деди Зеленский.
Унинг сўзларига кўра, Украина ғалабаси туфайли Украинада қанчалик тез тинчликка эришилса, Россия бошқа минтақаларга, жумладан, Эрон билан ҳамкорликда Яқин Шарққа шунча кам «ёвузлик сочишга улгуради».
Давлат раҳбари, шунингдек, 25 октябрь куни Украинага ташриф буюрган Германия президенти билан жуда мазмунли музокаралар ўтказганини айтди.
«Биз Германиядан тақдим этилган замонавий ва самарали ҳаво ҳужумидан мудофаа тизими учун жуда миннатдормиз. Худди шундай янги тизимларни кутяпмиз», — деди Украина раҳбари.
Унинг сўзларига кўра, Украина ва Германия раҳбарлари икки давлат ўртасидаги ўзаро ҳамкорликнинг бутун спектрини – мудофаа, сиёсий, молиявий соҳаларни муҳокама қилган.
«Украинани қайта тиклашга катта эътибор қаратилди, мен президент Штайнмайердан бу ишга шахсан ҳомийлик қилишга тайёрлиги учун миннатдорман. Биз Германия билан қайта қуриш соҳасида ҳамкорликни кучайтирамиз. Маҳаллий ҳокимиятлар даражасида ҳам бу президент ҳомийлигини олади», — дея давом этди у.
Зеленский, шунингдек, Буюк Британиянинг янги бош вазири Риши Сунак билан телефонда суҳбатлашгани, уни Украинага таклиф қилгани ҳақида айтди.
Изоҳ (0)