Mudofaa jangini tashkil etish bo‘yicha majmuaviy taktik o‘quvi hamda kuch tuzilmalari hamkorligidagi maxsus taktik o‘quvlar O‘zbekiston shimolida o‘tkazildi. Bu haqda Mudofaa vazirligi xabar qildi.
Qayd etilishicha, majmuaviy taktik o‘quv chegara qo‘shinlari bo‘linmalarining jangovar navbatchilikni o‘tash vaqtida to‘g‘ridan-to‘g‘ri shartli terrorchilar hujumini qaytarishi bo‘yicha amaliy harakatlar bilan boshlangan.
O‘quvlarni Qoraqalpog‘iston Respublikasi Jo‘qorg‘i Kengesi raisi Amanbay Orinbayev, Mudofaa vazirligi rahbariyati, harbiy okruglar vakillari, hududdagi kuch tuzilmalari mansabdorlari kuzatib borgan.
Jangovar chiziqda joylashgan o‘quv joylarida Mudofaa vazirligi, Davlat xavfsizlik xizmati, Milliy gvardiya bo‘yicha Qoraqalpog‘iston Respublikasi boshqarmasi, Qoraqalpog‘iston Respublikasi Ichki ishlar, Favqulodda vaziyatlar hamda Sog‘liqni saqlash vazirliklari bo‘linmalari hamkorligida maxsus-taktik o‘quvlar o‘tkazilgan.
Unda shartli ravishda temir yo‘l transportida hamda ko‘p qavatli binoda garovga olinganlarni ozod etish, blokpostga qilingan hujumni hamkorlikda qaytarish, merganlar juftligi harakati hamda aholi yashash punktida shartli dushmanni yakson qilish bo‘yicha maxsus harakatlar namoyish etilgan.
O‘quv so‘ngida mehmonlar harbiy okrugda mavjud bo‘lgan zamonaviy texnika hamda poligon hududida yangidan barpo etilgan ekstremal sharoitlarda yashovchanlik shaharchasi bilan yaqindan tanishgan.
Izoh (0)