O‘zbekiston va Rossiya kadrlar tayyorlash bo‘yicha hamkorlikni muhokama qiladi

Samarqandda 26–27-oktabr kunlari O‘zbekiston—Rossiya 3-ta’lim forumi o‘tkaziladi.

Oliy va o‘rta maxsus ta’lim vazirligining ma’lum qilishicha, forumda O‘zbekiston va Rossiya tomonidan 200 dan ortiq oliy ta’lim muassasalari rahbarlari, ishlab chiqarish korxonalari vakillari, vazirlik va idoralar mas’ullari ishtirok etadi.

Unda ikki davlat yetakchi oliy o‘quv yurtlari vakillari muhandislar, o‘qituvchilar va tarbiyachilar tayyorlash bo‘yicha hamkorlikni muhokama qiladi, uzluksiz ta’limni tashkil etish bo‘yicha tajriba almashadi. Energetika, kimyo sanoati sohalarida kadrlar tayyorlash, malaka oshirish va ilmiy faoliyatdagi hamkorlikni rivojlantirish masalalari ham ko‘rib chiqiladi.

Forum yakunida 100 ga yaqin hamkorlik shartnomasi imzolanishi kutilmoqda. Bitimlar asosan Rossiyada rivojlangan texnologik ishlab chiqarish sohalarining tajribasini O‘zbekiston oliygohlariga tatbiq etishga qaratilgan.