Samarqandda o‘zini qiz deb tanishtirgan yigit tovlamachilik qildi

Buxorlik talaba yigit bilan Telegram messenjerida tanishgan “qiz” aslida yigit ekani, tovlamachilik bilan shug‘ullangani ma’lum bo‘ldi.

Buxoro viloyati G‘ijduvon tumanida yashovchi talaba F.B. ariza bilan murojaat qilgan. Unda Telegram messenjerida o‘zini “Tojiboyeva Rayhon” deb tanishtirgan noma’lum shaxsga boshqalar ko‘rishi mumkin bo‘lmagan shaxsiy fotosuratlarini ishonib yuborganini, noma’lum shaxs fotosuratlarni olib, ijtimoiy tarmoqlar orqali tarqatmaslik uchun 900 ming so‘m pul talab qilayotganini ma’lum qilgan va qonuniy chora ko‘rishni so‘ragan.

Tezkor-qidiruv tadbirlari natijasida o‘zini “Tojiboyeva Rayhon” deb tanishtirgan noma’lum shaxs Samarqand viloyati Oqdaryo tumanida yashovchi, 1999-yilda tug‘ilgan J.Sh. ekani aniqlangan.

J.Sh.ga nisbatan Jinoyat kodeksining 165-moddasi (tovlamachilik) bilan jinoyat ishi qo‘zg‘atilib, tergov harakatlari olib borilmoqda.