O‘zbekistonda “Manfaatlar to‘qnashuvi to‘g‘risida”gi qonun loyihasi ma’qullandi

Oliy Majlis Qonunchilik palatasining navbatdagi majlisi kun tartibida “Manfaatlar to‘qnashuvi to‘g‘risida”gi qonun loyihasi ikkinchi o‘qishda muhokama qilindi.

Qonun loyihasi bilan “manfaatlar to‘qnashuvi” tushunchasiga aniq ta’rif berilib, ushbu vaziyat kimlar o‘rtasida va qachon vujudga kelishi mumkinligi to‘g‘risida aniq ko‘rsatib o‘tilmoqda. Davlat tashkiloti xodimlari, ularning yaqin qarindoshlari va ularga aloqador shaxslarning manfaatlar to‘qnashuvining oldini olish sohasidagi huquq va majburiyatlari belgilanmoqda.

Shuningdek, davlat tashkilotida aniqlangan manfaatlar to‘qnashuvi vaziyatlarini hisobga olish reyestri yuritilishi, manfaatlar to‘qnashuviga oid talablarni buzganlik uchun huquqiy oqibatlar nazarda tutilmoqda.

Qonun loyihasining qabul qilinishi davlat tashkilotlarida manfaatlar to‘qnashuvining oldini olish, aniqlash va tartibga solishning samarali mexanizmlarini joriy etish, uning huquqiy oqibatlarini aniq belgilashga xizmat qiladi.

Muhokamalardan so‘ng qonun loyihasi deputatlar tomonidan ikkinchi va uchinchi o‘qishda qabul qilindi hamda Senatga yuborildi.

Mavzuga doir:

• O‘zbekistonda “Manfaatlar to‘qnashuvining oldini olish to‘g‘risida”gi qonun loyihasi parlamentga kiritildi
• O‘zbekistonda 6 oyda o‘tkazilgan 4512 ta tender savdosining 2305 tasida 2511 ta raqobatga zid holat aniqlangan