Toshkent aeroportida yo‘lovchining regbi koptogiga gashish yashirilgani aniqlandi. Bu haqda Davlat bojxona qo‘mitasi axborot xizmati xabar berdi.
Toshkent xalqaro aeroportiga Istanbul—Toshkent reysi bo‘yicha parvozini yakunlagan hamda bojxonadan “yashil” yo‘lak orqali harakatlangan yo‘lovchilardan biriga tegishli bagaj belgilangan tartibda ko‘zdan kechirilgan. Natijada bagajda — yuklar orasidagi krossovka ichida yo‘lovchi bojxona deklaratsiyasida qayd etilmagan va bojxona xodimining og‘zaki so‘rovida ham ma’lum qilinmagan 33 dona elektron tamaki chekishga mo‘ljallangan ruchkasimon veyp qurilmasi hamda 32 dona ularni quvvatlovchi moslama borligi aniqlangan.
Shuningdek, bojxona xodimlarini shubhalantirgan regbi koptogi ochib ko‘rilganida esa uning ichida mato o‘ramlari orasiga yashirilgan holda 3 turdagi 72 dona o‘zidan o‘tkir hid taratayotgan ampulalar borligi aniqlandi.
Mazkur ampulalardagi modda esa gashish moyi bo‘lib, bu ularning qadog‘ida ham aks ettirilgan. Hozirda yuqoridagi holat yuzasidan tergovga qadar tekshiruv harakatlari olib borilmoqda.
Izoh (0)