«Дарё»да эълон қилинган мақолага жавобан журналист билан ахборот хизмати ходимига хос бўлмаган оҳангда гаплашишга уринган департамент ахборот хизмати ходими огоҳлантирилди. Бу ҳақда «Дарё»га Бош прокуратура ҳузуридаги иқтисодий жиноятларга қарши курашиш департаменти ахборот хизмати раҳбари Нурбек Ҳалимов хабар берди.
Аввалроқ «Дарё» нашрида Тошкентда 600 миллион сўмга яқин хизмат ҳақини ололмаётган қурувчилар ҳақида мақола эълон қилинган эди. Унда Бош прокуратура ҳузуридаги департаментнинг маъмурий биносини таъмирлашда иштирок этган қурувчилар хизмат ҳақини ололмаётгани хабар берилганди. Мазкур ҳолатни ўрганишга киришган «Дарё» журналисти департамент масъуллари, хусусан ахборот хизмати ходимидан керакли ахборотни олишда қийинчиликка учрагани учун Бош прокуратура ахборот хизмати раҳбари Ҳаёт Шамсутдиновдан ёрдам сўрагани, шундан сўнг департамент ахборот хизмати ходими «тилга киргани» қўшимча қилинган эди.
Мақоланинг мазкур қисмига эътироз билдирган департамент ахборот хизмати ходими Дилрабо Курязова ўз вақтида вазифасини бажармагани етмагандек, мақола муаллифи билан телефон қўнғироғи пайтида ахборот хизмати ходимига хос бўлмаган гапларни гапириб, эътироз билдирган.
Биламан сиз қитмир мухбирсиз, қитмир саволлар бериб, одамларнинг шахсиятига тегиш сизнинг услубингиз экан-да. Лекин тилга кирди деб ёзишга сизнинг ҳаққингиз йўқ эди, — дея журналистга қандай ёзиш кераклигини ўргатишга уринган у.Аниқланишича, департамент ахборот хизмати ходими Дилрабо Курязова ахборот олишга уринган «Дарё» журналистини ҳеч қандай камераларсиз ва ҳатто диктофонларсиз суҳбатга чақириб, сўнгра тасвирга оламиз дея ваъда берган. Бироқ суҳбатдан сўнг журналистга камера ёки диктофонга гапирмаслигини, ахборот беролмаслигини маълум қилган. Журналист ахборотнинг тўғри ва ҳаққонийлигини таъминлаш мақсадида масъуллардан кимдир журналист саволларига жавоб бериши лозимлигини уқтирган. Фойдаси бўлмагач, Бош прокуратура ахборот хизмати раҳбари Ҳаёт Шамсутдинов билан суҳбатлашиб, саволларга жавоб олишда кўмак сўраган.
Шундан сўнг эса Дилрабо Курязова ахборот бериш масъулияти ўзида қолганини айтиб, тайёргарлик кўриб олиш учун вақт сўраган. Лекин келишилган вақтда журналист ва ахборот хизмати ходими кўришолмаган. Дилрабо Курязова департамент масъуллари жавобини аудиоёзув шаклида журналистга етказган. Аммо жавоб қониқарсиз бўлган. Шунга қарамасдан Дилрабо Курязованинг изоҳи мазкур мақоладан тўлиқ ўрин олган. Мақола муаллифи эса департамент ахборот хизматининг жавоби қониқарсиз эканлигини ўзига билдирган. Шунга қарамасдан қўшимча жавоб бўлмаган.
Бу ҳолат юзасидан ходимимизга тушунтириш ишларини олиб бордик ва бу ҳолат қайта такрорланмайди, — дейди Нурбек Ҳалимов.