Moskvadagi “Ochakovo” zavodi O‘zbekiston va Qozog‘istonga CoolCola, Fancy va Street gazlangan ichimliklar eksportini yo‘lga qo‘ydi. Bu haqda kompaniya bayonotiga tayanib, “TASS” xabar bermoqda.
2022-yil oktabr oyida “Ochakovo” kompaniyasi O‘zbekiston va Qozog‘istonga CoolCola, Fancy va Street’ning birinchi jo‘natilishini amalga oshirdi.
CoolCola, Fancy va Street ishlab chiqarish 2022-yil mart oyida boshlangan. Kompaniya ma’lumotlariga ko‘ra, avgust oyigacha yangi mahsulotlar ilgari transmilliy kompaniyalar tomonidan ishlab chiqarilgan barcha qadoqlash formatlarida sotuvga chiqarildi.
Shu bilan birga, “Ochakovo”ning ishlab chiqarish quvvati 125 million dekalitr alkogolsiz gazlangan ichimliklar ishlab chiqarishga yetdi va CoolCola Zero bozorga chiqarildi.
“Eksport bozorlarining rivojlanishi Rossiya bilan bir vaqtda davom etadi. Biz juda ijobiy tendensiyani ko‘rmoqdamiz va bu yo‘nalishga sarmoya kiritishga tayyormiz, — dedi “Ochakovo” bosh direktori Yuriy Antonov.
Kompaniya vakillarining fikricha, Qozog‘iston va O‘zbekiston eng istiqbolli tashqi bozor hisoblanadi.
“Ochakovo” xorijiy kapital ishtirokisiz pivo va alkogolsiz sanoatdagi eng yirik Rossiya korxonasidir. Uning tarkibiga 10 ta sho‘ba korxona, jumladan, Moskva, Krasnodar, Penza va Tyumendagi solod zavodi, vino zavodi va qishloq xo‘jaligi korxonalari kiradi.
Kompaniyaning ichimliklari Rossiyaning 60 ta hududiga va 30 dan ortiq xorijiy mamlakatlarga yetkazib beriladi.
Izoh (0)