O‘zbekistonda olxo‘ri eksporti mavsumi yakunlanmoqda, so‘nggi o‘n kun ichida ushbu mahsulotning tashqi bozorlarga jo‘natilgan umumiy hajmi 80 tonnadan kam bo‘ldi. Bu haqda EastFruit xabar bermoqda.
2022-yilda O‘zbekistondan yangi olxo‘ri hosilining birinchi partiyalarini jo‘natish may oyining 10-sanasidan boshlandi.
Eksport mavsumi boshlanganidan buyon besh oy ichida mamlakatdan 2017—2021-yillardagi ko‘rsatkichlarga nisbatan rekord hajmda olxo‘ri eksport qilindi. Bunga asosiy omil — yilgi yuqori hosil hamda ichki bozordagi arzon narxlar bo‘ldi.
Dastlabki rasmiy statistik ma’lumotlarga ko‘ra, 2022-yilning 11-mayidan 10-oktabriga qadar O‘zbekiston hajmi 48,4 ming tonna, qiymati esa 23,4 million dollarlik sarxil olxo‘ri eksport qildi.
Bu o‘tgan yilning shu davriga nisbatan jismoniy jihatdan 2,5 barobar va 2019-yilgi rekord ko‘rsatkichdan deyarli 11 foizga ko‘pdir.
2017—2021 yillarda olxo‘ri eksporti mavsumi may oyining ikkinchi o‘n kunligidan erta boshlanmadi, shu bois, keltirilgan ma’lumotlar eksport mavsumi boshlanganidan buyon besh oylik natijalarni aks ettirgan.
2019-yil mustasno qilinganda, O‘zbekistondan sarxil olxo‘ri eksporti hajmida 2017—2021 yillarda barqaror pasayish trendi kuzatildi.
2022-yilgi hosil olxo‘risi eksportining keskin o‘sishiga O‘zbekistonda bu yil nisbatan yuqori hosil olingani va natijada ushbu mahsulot narxi keskin pasaygani sabab bo‘ldi.
Narxlar monitoringiga ko‘ra, 2022-yilgi mavsumda sarxil olxo‘rining ulgurji narxlari o‘tgan yilgidan o‘rtacha 2,4 barobar past bo‘ldi.
Izoh (0)