Ўзбекистонда олхўри экспорти мавсуми якунланмоқда, сўнгги ўн кун ичида ушбу маҳсулотнинг ташқи бозорларга жўнатилган умумий ҳажми 80 тоннадан кам бўлди. Бу ҳақда EastFruit хабар бермоқда.
2022 йилда Ўзбекистондан янги олхўри ҳосилининг биринчи партияларини жўнатиш май ойининг 10-санасидан бошланди.
Экспорт мавсуми бошланганидан буён беш ой ичида мамлакатдан 2017—2021 йиллардаги кўрсаткичларга нисбатан рекорд ҳажмда олхўри экспорт қилинди. Бунга асосий омил — йилги юқори ҳосил ҳамда ички бозордаги арзон нархлар бўлди.
Дастлабки расмий статистик маълумотларга кўра, 2022 йилнинг 11 майидан 10 октябрига қадар Ўзбекистон ҳажми 48,4 минг тонна, қиймати эса 23,4 миллион долларлик сархил олхўри экспорт қилди.
Бу ўтган йилнинг шу даврига нисбатан жисмоний жиҳатдан 2,5 баробар ва 2019 йилги рекорд кўрсаткичдан деярли 11 фоизга кўпдир.
2017—2021 йилларда олхўри экспорти мавсуми май ойининг иккинчи ўн кунлигидан эрта бошланмади, шу боис, келтирилган маълумотлар экспорт мавсуми бошланганидан буён беш ойлик натижаларни акс эттирган.
2019 йил мустасно қилинганда, Ўзбекистондан сархил олхўри экспорти ҳажмида 2017—2021 йилларда барқарор пасайиш тренди кузатилди.
2022 йилги ҳосил олхўриси экспортининг кескин ўсишига Ўзбекистонда бу йил нисбатан юқори ҳосил олингани ва натижада ушбу маҳсулот нархи кескин пасайгани сабаб бўлди.
Нархлар мониторингига кўра, 2022 йилги мавсумда сархил олхўрининг улгуржи нархлари ўтган йилгидан ўртача 2,4 баробар паст бўлди.
Изоҳ (0)