Toshkentda 23-oktabr kuni O‘zbekiston: Markaziy Osiyo bo‘ylab zamonlar osha sayohat filmining taqdimoti bo‘lib o‘tgani haqida xabar berilgan edi. Fransiyaning O‘zbekistondagi elchisi Oreliya Bushez ushbu film bo‘yicha o‘z fikrlarini bildirib o‘tdi.
“O‘zbekiston, Markaziy Osiyo bo‘ylab zamonlar osha sayohat” hujjatli filmi namoyishida sizlar bilan birga bo‘lganimdan juda xursandman. Ushbu filmni tomosha qilgandan so‘ng, biz 2022-yil noyabr oyida Parijdagi Luvrda ochiladigan bo‘lajak ko‘rgazmaning ko‘lami haqida birinchi tasavvurga ega bo‘lishimiz mumkin”, — deydi Bushez.
Elchining ta’kidlashicha, mazkur film va ko‘rgazma orqali Fransiya jamoatchiligi O‘zbekistonning boy madaniy merosi bilan yaqindan tanishish imkoniyatiga ega bo‘ladi.
“Mamlakatingiz fransuzlar uchun u qadar tanish emas, hozirgacha ko‘pchilik bu Markaziy Osiyodagi eng ko‘p aholiga ega mamlakat ekanligini, jadal rivojlanib borayotganini va juda hurmatga sazovor ekanligini biladi. Xalqimiz Samarqand, Buxoro kabi ulug‘ shaharlaringiz haqida ko‘p eshitgan, ularni ziyorat qilishni, karvon yo‘llari o‘tgan joylarni o‘z ko‘zlari bilan ko‘rishni orzu qiladi. Shuningdek, ular xalqingiz shu kunga qadar saqlab kelgan barcha madaniy meros xazinalarini kashf qilishni orzu qiladi”, — deydi Fransiya elchisi.
Uning so‘zlariga ko‘ra, Samarqandga Fransiyadan kelayotgan sayyohlar sonining ko‘pligi ham shu bilan bog’liq, ularning soni kun sayin ortib bormoqda. Masalan, yiliga 20 ming nafar fransuz sayyohlari O‘zbekistonga tashrif buyuradi.
Elchi film ustida ishlagan barchaga, birinchi navbatda uning direktori janob Darakchiyevga va Le Poisson Volant kompaniyasi prodyuseri Sofi Gupi xonimga minnatdorchilik bildirgan.
Film Madaniyat va san’atni rivojlantirish jamg‘armasi tomonidan Fransiyaning Les Poissons Volants kinokompaniyasi, ARTE madaniyat telekanali va Luvr muzeyi bilan hamkorlikda yaratilgan.
Ushbu film rejissor Jivko Darakchiyev tomonidan suratga olingan bo‘lib, O‘rta Yer dengizi va Xitoy o‘rtasidagi Markaziy Osiyoning qoq yuragi – turli tamaddunlar, madaniyatlar, dinlar va turmush tarzlari ro‘baro‘ bo‘ladigan vohaga karvon yo‘llari bo‘ylab harakatlanayotgan g‘oyibona sayohatchilar tilidan so‘zlanuvchi hikoya hisoblanadi.
Izoh (0)