Ғафур Ғулом боғи «Dream Парк» номи билан қайта очилди (видео)

Тошкент шаҳри Чилонзор туманида жойлашган Ғафур Ғулом номидаги маданият ва истироҳат боғида таъмирлаш ишлари якунига етмоқда. Бу ҳақда туман ҳокимлиги ахборот хизмати хабар берди.

Қайд этилишича, ҳозирда боғнинг тест режимидаги (ёпиқ ҳолатда) фаолияти синаб кўрилмоқда. Яъни ўрнатилган ускуналар аҳоли хавфсизлиги учун қайта-қайта синовлардан ўтказилмоқда. Тозалаш ва тартибга келтириш ишлари олиб борилмоқда.

Боғнинг реконструкция концепцияси ўзининг ёндашуви билан ажралиб туради.

Биз фақатгина пойтахтнинг энг йирик яшил ҳудудларидан бирини сақлаб қолишни эмас, балки ҳудудни янги ва турли дарахтлар, буталар ва гуллайдиган ўсимликлар билан тўлдиришни ҳам ўз олдимизга вазифа сифатида қўйгандик. Тез орада бу ерда табиат билан уйғунликни сақлаган ҳолда ҳақиқатда ҳам дам олиш мумкин бўлади, — дейди боғ директори ўринбосари Зафар Мирзаулуков.

Боғ «экофрендли» услубида янгиланди. Хусусан, энг кичик ташриф буюрувчилар учун ўйин майдонларида хорижда ишлаб чиқарилган тўлиқ табиий композицион материаллардан бўлган турли арқонли зиналар, қоялар ва канатлар ўрнатилди.

Боғга, шунингдек, чархпалак қайтарилди. Пиёда сайр қилиш ва югуриш йўлакларига жой бўшатиш учун боғда аттракционлар сони камайтирилган. Бунда ташкилотчилар аттракционларни уларнинг анча замонавий ва хавфсиз турларига ўзгартирди.

Боғ ҳудудида жойлашган иккита кўл тўла таъмирланиб, гидротизимлар тўлиқ ўзгартирилди, шунингдек, кўлларнинг атрофида пляж зоналари ва табиат қуршовида дам олиш учун жойлар яратилди. Кўлларнинг бирида қайиқ ва катамаранлар сақлаб қолинмоқда, иккинчи кўл эса ўрдаклар учун ажратилган.

Дам олиш маскани тез кунларда ўз фаолиятини бошлайди.

Мавзуга доир: 

• Ғафур Ғулом боғи қачондан иш бошлаши маълум бўлди
• Ғафур Ғулом боғи масаласи кун тартибимизда турибди — Сенат
• Жаҳонгир Ортиқхўжаев Ғафур Ғулом боғини 49 йилга Сингапур компаниясига ижарага бериш масаласи қайта кўриб чиқилишини айтди