Surxondaryo viloyati Denov tumanidagi shifoxonada hamshiraning farzandi oldida kaltaklangani haqida video ijtimoiy tarmoqlarda tarqaldi. SSV holat yuzasidan ma’lumot berdi.
Ma’lum bo‘lishicha, Denov tuman sil kasalliklar shifoxonasi bosh hamshirasi D.I. va mazkur davolash muassasasi fizioterapiya bo‘limi hamshirasi S.T.ning shaxsiy adovati sabab 18-oktabr kuni ertalab soat 10:00 lar atrofida ziddiyatli holat yuzaga kelgan. Ushbu holatga S.T.ning yaqinlari ham aralashib, shifoxona bosh hamshirasiga tan jarohati yetkazgan.
“Tibbiyot xodimlarining odob-axloq qoidalariga zid xatti-harakatlarni sodir etgan hamshiralar vaqtincha ishdan chetlashtirildi. Shu bilan birga, kaltaklangan hamshira qizining ruhiy holati va sog‘lig‘i mutaxassislar nazoratiga olingan”, — deya qayd etilgan vazirlik xabarida.
Viloyat IIBning aniqlik kiritishicha, hamshirani kaltaklayotgan ayol u bilan janjallashgan hamshiraning onasi bo‘lgan. Holatni jabrlangan hamshiraning voyaga yetmagan qizi qo‘l telefonida tasvirga olib turgan.
Ushbu holat tuman IIB tomonidan tegishli tartibda qayd etilgan bo‘lib, tergovga qadar tekshiruv harakatlari olib borilmoqda. Hozirda hodisa ishtirokchilarining olgan tan jarohati yuzasidan sudga oid tibbiy ekspertizadan o‘tkazilgan.
“Tergovga qadar tekshiruv harakatlari yakuni bilan aybdor shaxslarga nisbatan qonunda belgilangan muddatda va tartibda tegishli choralar ko‘riladi”, — deyiladi IIB xabarida.
Izoh (2)
Афсус вахшийлик бу хамшира ва онасини жиноий жавобгарликка тортиш керак бола бечорани йиглаганини куриб юрагим узулиб тушай деди , тегишли мутасадди органлардан вазиятга хакконий бахо беришини кутиб коламиз
АССАЛОМУ алайкум кандай вахшийлик бу муштим зур аёлга камок жазоси берилш керак нима хакки бор бировни сочидан судраб уришга яна уз фарзанди куз унгда болани йиглаганини ешитб ведиони охиргача кураолмадим