Сурхондарё вилояти Денов туманидаги шифохонада ҳамширанинг фарзанди олдида калтаклангани ҳақида видео ижтимоий тармоқларда тарқалди. ССВ ҳолат юзасидан маълумот берди.

Маълум бўлишича, Денов туман сил касалликлар шифохонаси бош ҳамшираси Д.I. ва мазкур даволаш муассасаси физиотерапия бўлими ҳамшираси С.Т.нинг шахсий адовати сабаб 18 октябрь куни эрталаб соат 10:00 лар атрофида зиддиятли ҳолат юзага келган. Ушбу ҳолатга С.Т.нинг яқинлари ҳам аралашиб, шифохона бош ҳамширасига тан жароҳати етказган.

«Тиббиёт ходимларининг одоб-ахлоқ қоидаларига зид хатти-ҳаракатларни содир этган ҳамширалар вақтинча ишдан четлаштирилди. Шу билан бирга, калтакланган ҳамшира қизининг руҳий ҳолати ва соғлиғи мутахассислар назоратига олинган», — дея қайд этилган вазирлик хабарида.

Вилоят ИИБнинг аниқлик киритишича, ҳамширани калтаклаётган аёл у билан жанжаллашган ҳамширанинг онаси бўлган. Ҳолатни жабрланган ҳамширанинг вояга етмаган қизи қўл телефонида тасвирга олиб турган.

Ушбу ҳолат туман ИИБ томонидан тегишли тартибда қайд этилган бўлиб, терговга қадар текширув ҳаракатлари олиб борилмоқда. Ҳозирда ҳодиса иштирокчиларининг олган тан жароҳати юзасидан судга оид тиббий экспертизадан ўтказилган.

«Терговга қадар текширув ҳаракатлари якуни билан айбдор шахсларга нисбатан қонунда белгиланган муддатда ва тартибда тегишли чоралар кўрилади», — дейилади ИИБ хабарида.