Sirdaryodagi portlashdan zarar ko‘rgan turar va noturarjoy binolarga 10 ming kvadrat oyna va 4,5 ming listdan ortiq shifer yetkazib berildi.
Viloyat hokimligi matbuot xizmati xabariga ko‘ra, o‘tgan bir sutka davomida ziyon yetgan binolarning yarmidan ortig‘i to‘liq ta’mirlandi.
Hozirga qadar barcha 10 ta mahalladagi xonadonlarga va 38 ta ijtimoiy obyektlarga 10 ming kvadrat oyna va 4,5 ming listdan ortiq shifer yetkazildi.
Mudofaa vazirligining bildirishicha, ayni vaqtda hududga jalb etilgan harbiy xizmatchilar tomonidan harbiy qism atrofidagi ayrim mahallalarning shikast yetgan xonadonlari ko‘zdan kechirilib, uy egalariga yordam ko‘rsatilyapti.
Xonadonlarning oynalari yangilanmoqda, tom qismiga zarar yetgan obyektlar ta’mirlanyapti. Hosil bo‘lgan chiqindilar to‘liq tozalanyapti. Harbiy qism hududida joylashgan harbiy shaharchada ham ayrim xonadonlarning singan oynalari va eshiklari ta’mirlanmoqda.
22-oktabr kuni soat 04:55 da Sirdaryo viloyati Malik aholi punktidagi Mudofaa vazirligi omborida yakka tartibda portlash sodir bo‘lgandi. Ushbu hodisa oqibatida jarohat olgan 16 nafar bemorning 12 nafari Sirdaryo tumani tibbiyot birlashmasiga olib kelingan. Barcha jarohat olganlarga zudlik bilan birinchi yordam ko‘rsatilgan. Hisob-kitoblarga ko‘ra, 3742 ta turar va noturar joyning tomi, shifti, deraza va eshik romlariga qisman talafot yetgan.
Izoh (0)