Ҳиндистоннинг Деҳли шаҳрида тутқунликда қолган ўзбекистонлик аёллар ватанга қайтишда ёрдам сўраб қилган видеомурожаати ижтимоий тармоқларда тарқалди. Ҳолатга Ўзбекистоннинг Ҳиндистондаги элчихонаси муносабат билдирди.
Расмий хабарга кўра, 28 август куни фуқаро Д.М. ва унинг ҳамроҳлигида жами 7 нафар Ўзбекистон фуқароси Ўзбекистоннинг Ҳиндистондаги элчихонасининг консуллик бўлимига ватанга қайтаришда кўмаклашишни сўраб мурожаат қилган. Элчихона томонидан мазкур фуқароларга тезкор равишда барча тегишли консуллик-ҳуқуқий ёрдами кўрсатилди.
Хусусан, уларнинг яшаш жойи мавжуд эмаслиги ва молиявий оғир аҳволидан келиб чиқиб, зудлик билан Деҳли шаҳрида Empowering Humanity нодавлат ташкилоти билан ҳамкорликда бошпана билан таъминлашга эришилиб, уларга уч маҳал иссиқ овқат бериб келинмоқда. Ўз навбатида, мурожаат қилган фуқароларнинг шахсини тасдиқловчи ҳужжати бўлмаганлигини инобатга олиб, уларга ватанга қайтиш гувоҳномаси расмийлаштирилди.
«Таъкидлаш лозимки, юқорида қайд этилган фуқаролар Ҳиндистон ҳуқуқни муҳофаза қилувчи идоралари томонидан Ҳиндистон ҳудудига ноқонуний йўллар билан кириб келганликлари ва ушбу мамлакатда бўлиш қоидаларини бузганликлари аниқланган. Шу билан биргаликда, видеомурожаат муаллифи — Д.М. ва унинг ҳамроҳлари масаласида Ҳиндистон ҳуқуқни муҳофаза қилувчи идоралари томонидан тегишли тергов ва суд жараёнлари давом этаётгани сабабли уларнинг ушбу давлат ҳудудидан чиқишига вақтинчалик чеклов қўйилган. Ушбу ҳуқуқий жараёнлар якунлангач, юқоридаги фуқаролар тезкор равишда Ўзбекистонга қайтарилиши таъминланади», — дейилади элчихона хабарида.
Таъкидлашича, ушбу масала Ўзбекистоннинг Ҳиндистондаги элчихонаси томонидан қатъий назоратга олинган ва қайд этилган фуқаролар учун зарур бўлган тегишли консуллик-ҳуқуқий ёрдам кўрсатилмоқда. Мазкур ҳолат юзасидан Ҳиндистоннинг ваколатли идоралари билан мунтазам алоқа ўрнатилган.
Изоҳ (0)