“Davlat tilida yozilmagan hujjatlar ekspertizaga qabul qilinmaydi”. Shahnoza Soatova davlat tilining qonunchilikdagi o‘rni haqida

“Daryo” internet-nashri hamda Toshkent shahri hokimligi qoshidagi Jamoatchilik kengashi hamkorligida tashkil etilgan “Mahalla. Muammo. Mulohaza” loyihasining 3-soni mehmoni adliya vazirining davlat tili masalalari bo‘yicha maslahatchisi, bloger Shahnoza Soatova bo‘ldi. Ko‘rsatuvning bu galgi mavzusi — o‘zbek tilini o‘rganish muammolari.

Shahnoza Soatova qonunchilik hujjatlaridagi davlat tili bilan bog‘liq muammolarni sanab, ularning yechimlariga ham to‘xtaldi.

“Bizda ko‘p gapirishadi qonun tilini, uning g‘alizligini, boshqa tildan tarjima qilinishini, davlat tilida yozilmasligini.

Oxirgi paytda mana biz Adliya vazirligida davlat tilida yozilmagan qonunchilik hujjatlari loyihalarini ekspertizaga qabul qilmayapmiz. Qaytarib yuboryapmiz.

Yoki, masalan, jamoatchilik muhokamasi portaliga qo‘yiladigan hujjatlarni olsak. U yerdagi loyihalarni muvofiqlashtirish ham bizning zimmamizda. Agar ular ham davlat tilida bo‘lmasa, portalga qo‘ymaymiz. Davlat tilida bo‘lishi shart.

Mana shunday ishlar bilan davlat tilini tartibga sola boshladik. Albatta, hamma ishni qilib, qotirib qo‘ydik, endi bayram qilsak bo‘ladi, demaymiz. Bayramni nishonlaymiz-u, ammo qiladigan ishlar ham ko‘p”, — deydi bloger.