«Дарё» интернет-нашри ҳамда Тошкент шаҳри ҳокимлиги қошидаги Жамоатчилик кенгаши ҳамкорлигида ташкил этилган «Маҳалла. Муаммо. Мулоҳаза» лойиҳасининг 3-сони меҳмони адлия вазирининг давлат тили масалалари бўйича маслаҳатчиси, блогер Шаҳноза Соатова бўлди. Кўрсатувнинг бу галги мавзуси — ўзбек тилини ўрганиш муаммолари.
Кўрсатув меҳмонининг қайд этишича, ўзбек тили йўқ бўлиб кетиш арафасида турган тиллар қаторида турмайди, бу тилда 50 миллион аҳоли сўзлашади. Аммо тилда бу аҳолининг барча эҳтиёжларини қондиришга етарли база йўқ.
«Ўзбек тили — дунёда 50 миллион аҳоли гаплашадиган тил. Йўқолиб кетмайди, бунақа хавф йўқ, тўғри.
Лекин «Бу аҳоли ўзбек тилида нимани гапиряпти, тил уларнинг қайси эҳтиёжларини қондиряпти-ю, қайсиларини қондирмаяпти?» деган саволни қўйсак, умуман бошқача манзара намоён бўлади.
Масалан, одамлар маиший турмушда, кундалик мулоқотда ишлатяпти, қорни очлиги, жони оғриганини шу тилда ифодалай оляпти. Лекин сифатли фильм кўраман деса, яхши илмий асар ўқийман деса, бугун чиққан янгиликларни биринчи манбадан кўраман деса, адабиёт бўйича Нобель мукофоти олган ёзувчининг асарини ўқийман деса, у қайси тилга мурожаат қилади? Ўзбек тилида борми улар?
Мана шундай саволларни қўяверсак, бизнинг олдимизда қанчалик катта вазифалар турганини кўра бошлаймиз. Мана бугунги кунда қилишимиз керак бўлган ишлар.
Яъни, ўзбек тилимиз ҳозирги замон талабларига ҳозиржавоб бўлиши керак. Кўпроқ эҳтиёжларни қондириши керак. Одам фақат маиший ҳаёт билан яшамайди. Унинг маънавий ҳаёти ҳам бор, ақлий эҳтиёжлари бор. Мана шуларни қониқтирадиган тилга айлантиришимиз керак.
Кўрсатувни тўлиқ тарзда «Дарё»нинг YouTube’даги саҳифаси орқали томоша қилиш мумкин.
Изоҳ (0)