Тошкент шаҳрида «ЎзЛиДеП пресс-клуби»нинг навбатдаги сессияси бўлиб ўтди. Унда яширин иқтисодиётни қисқартириш, товарларнинг ноқонуний айланмасини олдини олиш масалалари муҳокама қилинди, дея хабар бермоқда «Дарё» мухбири.
Сессияда Ўзбекистон либерал демократик партияси депутатлари, солиқ, божхона, фармацевтика, прокуратура ва бошқа ташкилотлар мутахассислари иштирок этди.
ЎзЛиДеП бўлим мудири Бахтиёр Руҳиддиновнинг айтишича, хуфиёна иқтисодиётни қисқартиришнинг муҳим чораларидан бири барча ташкилотларни ҳамкорликда ишлашидир.
«Сессияда яширин иқтисодиётнинг 3 та йўналиши: фармацевтика, алкоголь ва тамаки маҳсулотлари контрабандасини олдини олиш масаласида мулоқот қилинди. Бу масалага комплекс ёндашиш муҳим. Шунинг учун кўплаб вазирлик ва идоралар билан ҳамкорликда ишланса, натижага эришиш осон бўлади. Сессияни жонли эфир орқали ижтимоий тармоқларда кенг ёритишимиздан мақсад – жамоатчиликни яширин иқтисодиётга қарши ҳиссини шакллантиришдан иборат»– деди мутахассис.
Сессияда мамлакатда тамаки маҳсулотлари контрабандаси ўсиб бораётганига алоҳида урғу берилди. Таъкидланишича, сўнги 2 йил ичида тамаки маҳсулотларининг ноқонуний айланмаси ҳажми 4 фоиздан 15 фоизга ортган. Ўзаро мулоқотда Давлат божхона қўмитаси ходими Улуғбек Қосимов ноқонуний айланмасига чек қўйилган дори, алкоголь ва тамаки маҳсулотларининг миқдори ҳақида маълумот берди.
«2022 йилнинг ўтган 9 ойи давомида 670 миллиард сўмлик мамлакатга ноқонуний олиб кирилаётган дори, алкоголь ва тамаки маҳсулотлари ушланган. Шундан дори воситалари 30,6 миллиард сўмни, тамаки 17,5 миллиард сўмни ташкил қилган», – деди иштирокчи.
Мулоқотда Янги Ўзбекистоннинг тараққиёт стратегиясида келгуси беш йил ичида аҳоли жон бошига ялпи ички маҳсулотни 1,6 баробарга ошириш, 2030 йилга бориб республикани «даромади ўртачадан юқори бўлган давлатлар» қаторига кириш белгиланган. Мазкур мақсадга етиш учун эса яширин иқтисодиётни кескин қисқартириш, товарларнинг ноқонуний айланмасини олдини олиш, истеъмолчилар ҳуқуқларини ҳимоя қилиш, шаффоф иқтисодий ва рақобат муҳитини яратиш лозим. Шу билан бирга, контрабанда муаммосига қарши курашишда фаол жамоатчилик назоратини ўрнатиш ҳам муҳим аҳамиятга эга.
Изоҳ (0)