Britaniya bosh vaziri Liz Trass Konservativ partiya deputatlarining chaqiriqlariga qaramay iste’foga chiqishdan bosh tortdi. BBC telekanaliga bergan intervyusida u o‘z obro‘sini saqlab qolish uchun kurashishga tayyorligini hamda konservatorlarni navbatdagi parlament sayloviga olib chiqmoqchiligini ta’kidladi. Trass xonim xatolarini tan olishini aytib, uzr so‘radi.
“Juda og‘ir davrlarni boshdan kechirmoqdamiz. Konservatorlar partiyasi haqida gapirib vaqt yo‘qotish emas, aksincha, ishga kirishishimiz kerak. Bu mening hamkasblarimga murojaatim. Men milliy manfaatlar yo‘lida harakat qilish uchun o‘z lavozimimda qolaman” — dedi Trass BBC’ga.
Bosh vazir odamlarga elektr to‘lovlari va yuqori soliqlar muammosini yengishda yordam bermoqchiligini, ammo hukumat “juda uzoqqa va juda tez ketib qolganini” ta’kidladi. U yo‘l qo‘yilgan xatolar uchun uzr so‘rashini aytdi va o‘zining iqtisodiy strategiyasini o‘zgartirib, Moliya vazirligiga yangi rahbar tayinlaganini eslatdi.
Iqtisodiy barqarorlik endi ustuvor ahamiyatga ega, dedi Trass va mamlakatda “soliqlari past, o‘sishi yuqori iqtisodiyot” saqlanib qolayotganini qo‘shimcha qildi.
Sentabr oyi oxirida Trass yordamchisi va moliya vaziri Kvazi Kvarteng bilan birgalikda soliqlarni keskin kamaytirish va boshqa choralarni o‘z ichiga olgan iqtisodiy rivojlanish rejasini taqdim etgandi. Bu Britaniya bozorlari va funt sterlingining qulashiga olib keldi. Shu sababli, bosh vazir moliya vazirini ishdan bo‘shatdi va o‘zining ko‘plab rejalaridan voz kechdi. Konservativ partiyaning bir qator deputatlari ochiqchasiga Trassning iste’fosini talab qildi. Daily Mail gazetasining yozishicha, 100 dan ortiq deputat ishonchsizlik votumi o‘tkazish tarafdori. Bosh vazir lavozimiga nomzodlardan biri sifatida ba’zi deputatlar mudofaa vaziri Ben Uollesni taklif qilmoqda.
Izoh (0)