Rossiyaning Krasnodar o‘lkasi Yeysk shahrida Su-34 qiruvchi-bombardimonchi samolyoti turar joy dahasiga qulashi oqibatida halok bo‘lganlar soni 13 kishiga yetdi. Bu haqda mamlakat Sog‘liqni saqlash vazirligi ma’lum qilmoqda.
Favqulodda vaziyatlar vazirligi xabariga ko‘ra, samolyot qulagan joyda vayronalar ko‘zdan kechirilgach, o‘n kishining jasadi topilgan. “Shu tariqa, halok bo‘lganlarning umumiy soni 13 kishiga yetdi, shularning uch nafari bolalardir”, — deyiladi idora xabarida. Avvalroq sog‘liqni saqlash vaziri uch nafar, mahalliy hukumat esa to‘rt nafar qurbon haqida xabar bergandi.
19 kishi jarohatlangan, ular orasida ikki nafar homiladorlar ham bor.
FVV ma’lumotlariga ko‘ra, vayronalarni tekshirib chiqish yakunlangan, qutqaruv operatsiyasi chog‘ida 68 kishi qutqarib olingan, 360 dan ortiq odam evakuatsiya qilingan.
Mudofaa vazirligi xabar qilganidek, Su-34 Janubiy harbiy okrugdagi harbiy aerodromdan o‘quv parvozini amalga oshirayotgan bo‘lgan, u balandlikka ko‘tarilish chog‘ida halokatga uchragan, ikkala uchuvchi ham katapulta vositasida samolyotdan chiqib olgan. Avariyaga dvigatellardan birining yonib ketishi sabab bo‘lgan. Samolyot ko‘p qavatli binoga to‘qnashib, vayron bo‘lgan, biroq portlamagan, yong‘in yonilg‘i to‘kilishi oqibatida yuzaga kelgan. Alanga uyning 2 ming kvadrat metr maydonini qamrab olgan, yong‘in o‘chirilgan. 72 ta xonadonga zarar yetgan.
Tergov qo‘mitasi jinoyat ishi qo‘zg‘atdi, harbiy prokuratura tekshiruv boshladi. Mintaqa gubernatori halok bo‘lganlarning oilalariga 1 million rubldan, jabrlanganlarga esa 500 ming rubldan to‘lashga va’da berdi.
Izoh (0)