Россиянинг Краснодар ўлкаси Ейск шаҳрида Су-34 қирувчи-бомбардимончи самолёти турар жой даҳасига қулаши оқибатида ҳалок бўлганлар сони 13 кишига етди. Бу ҳақда мамлакат Соғлиқни сақлаш вазирлиги маълум қилмоқда.
Фавқулодда вазиятлар вазирлиги хабарига кўра, самолёт қулаган жойда вайроналар кўздан кечирилгач, ўн кишининг жасади топилган. «Шу тариқа, ҳалок бўлганларнинг умумий сони 13 кишига етди, шуларнинг уч нафари болалардир», — дейилади идора хабарида. Аввалроқ соғлиқни сақлаш вазири уч нафар, маҳаллий ҳукумат эса тўрт нафар қурбон ҳақида хабар берганди.
19 киши жароҳатланган, улар орасида икки нафар ҳомиладорлар ҳам бор.
ФВВ маълумотларига кўра, вайроналарни текшириб чиқиш якунланган, қутқарув операцияси чоғида 68 киши қутқариб олинган, 360 дан ортиқ одам эвакуация қилинган.
Мудофаа вазирлиги хабар қилганидек, Су-34 Жанубий ҳарбий округдаги ҳарбий аэродромдан ўқув парвозини амалга ошираётган бўлган, у баландликка кўтарилиш чоғида ҳалокатга учраган, иккала учувчи ҳам катапульта воситасида самолётдан чиқиб олган. Аварияга двигателлардан бирининг ёниб кетиши сабаб бўлган. Самолёт кўп қаватли бинога тўқнашиб, вайрон бўлган, бироқ портламаган, ёнғин ёнилғи тўкилиши оқибатида юзага келган. Аланга уйнинг 2 минг квадрат метр майдонини қамраб олган, ёнғин ўчирилган. 72 та хонадонга зарар етган.
Тергов қўмитаси жиноят иши қўзғатди, ҳарбий прокуратура текширув бошлади. Минтақа губернатори ҳалок бўлганларнинг оилаларига 1 миллион рублдан, жабрланганларга эса 500 минг рублдан тўлашга ваъда берди.
Изоҳ (0)