Ўзбекистоннинг Ҳиндистондаги элчиси Дилшод Аҳатов ушбу давлат Сайёҳлик агентлари уюшмаси президенти (Travel Agents Association of India — ТААI) Жёти Майал ва Ташқи туроператорлар уюшмаси президенти Риаз Мунши билан учрашувлар ўтказди, деб хабар қилмоқда «Дунё» АА.
Қайд этилишича, учрашувларда мамлакатлар ўртасидаги туризм соҳасидаги ҳамкорликнинг жорий ҳолати муҳокама қилинди, сайёҳлар оқимини ошириш бўйича амалий чора-тадбирлар тўғрисида фикр алмашилди.
Ҳиндистон Сайёҳлик агентлари уюшмаси президенти Жёти Майал Ўзбекистоннинг туризм соҳасидаги юқори салоҳиятини эътироф этиб, ҳиндистонлик сайёҳлар оқимини кескин ошириш бўйича ҳамкорликка тайёр эканлигини таъкидлади.
Ҳиндистон Ташқи туроператорлари уюшмаси президенти Риаз Мунши Ўзбекистон анъанавий равишда ҳинд сайёҳлари ўртасида энг севимли йўналишлардан бири эканини қайд этди. Ҳамкорликнинг самарадорлигини янада кенгайтириш мақсадида икки мамлакат ўртасидаги мавжуд авиақатновлар сонини ошириш имкониятлари муҳокама қилинди.
Ушбу икки етакчи сайёҳлик уюшмалари раҳбарияти билан 2022 йил якунига қадар ва 2023 йилда ҳамкорликда амалга ошириладиган тадбирлар ва режалар хусусида батафсил фикр алмашилди.
Маълумот учун, Ҳиндистон Сайёҳлик агентлари уюшмаси 1951 йилда ташкил топган бўлиб, бугунги кунда унинг таркибига 2 минг 500 дан ортиқ сайёҳлик соҳасида фаолият олиб борувчи турли компаниялар киради. Ҳиндистон Ташқи туроператорлари уюшмаси мамлакатнинг туризм соҳасидаги энг йирик уюшмаларидан бири бўлиб, ҳозирги вақтда унга аъзо бўлган туркомпания ва агентликлар сони икки мингдан ошади.
Мавзуга доир: Ўзбекистонга 9 ойда қанча сайёҳ келгани маълум бўлди
Изоҳ (0)